Францияда Миллий Ассамблея депутатлари ҳукуматга ишончсизлик овозини бериш учун тайёргарлик кўришмоқда. Сўлчи «Янги халқ фронти» коалицияси ва ўнг қанот «Миллий бирлашув» партияси 4 декабрь куни бу масалада овоз беришни режалаштиряпти. Қарор ҳукуматнинг 2025 йилдаги ижтимоий суғурта бюджетини парламент муҳокамасисиз тасдиқлаш қароридан кейин қабул қилинган.

Баҳсларнинг асоси Франция ҳукуматининг иқтисодий тежамкорлик бўйича 60 миллиард евро миқдоридаги режаларига бориб тақалмоқда. Ушбу режада давлат харажатларини 40 миллиардга қисқартириш ва 20 миллиард евро солиқларни ошириш таклиф қилинган. Бундай чора-тадбирлар мамлакатда жиддий мухолифликка сабаб бўлди ва ҳукуматнинг обрўсига зарар етказди.

«Миллий бирлашув» партияси етакчиси Марин Ле Пен ҳукуматни айрим тежамкорлик чораларидан воз кечишга чақирди. Ле Пен, жумладан, электр энергияси нархларини оширмаслик ва қочқинлар учун бепул тиббий хизматлар рўйхатини қисқартириш таклифини қўллаб-қувватлаган. Шунга қарамай, пенсияларни инфляция даражасига боғлашдан бош тортишга ҳукумат рози бўлмади.

Мишель Барнье бошчилигидаги ҳукумат «Янги халқ фронти» ва «Миллий бирлашув»нинг бирлашган овозларига қарши туриши қийин бўлиши мумкин. Ҳукуматга ишончсизлик овозини бериш учун 577 депутатдан камида 288 нафари қўллаб-қувватлаши керак. Чап қанот коалициясининг 190та ва «Миллий бирлашув» партиясининг 126та овози бор ва бу амалдаги ҳукумат истеъфоси учун етарли бўлиши мумкин.

Қайд этиш керакки, Марин Ле Пен ҳукуматни францияликларнинг турмуш тарзига салбий таъсир қиладиган қарорлардан сақланишга чақирмоқда. Унинг фикрича, ҳукумат сиёсатининг натижалари аҳоли ўртасида ҳукуматга нисбатан ишончсизликни оширган.

Бу вазият Франция сиёсий тизимидаги кескинликларни яққол намоён этмоқда. Ҳукуматнинг кейинги қадамлари мамлакатнинг иқтисодий ва сиёсий барқарорлигига катта таъсир кўрсатиши мумкин. Овоз бериш натижаси Франциянинг сиёсий йўналишига жиддий ўзгариш киритиши ҳам эҳтимолдан йироқ эмас. Хусусан, ҳукуматдаги ўзгаришлар Россия – Украина можаросига ҳам ўзига хос таъсирини ўтказиши хавотирларга сабаб бўляпти.