Филиппинлик афсонавий боксчи Мэнни Пакьяо 19 июл куни Лас-Вегасда Марио Барриосга қарши жанг ўтказади. ESPN хабарига кўра, бу баҳсда WBC ярименгил вазн тоифаси чемпионлик камари ўйналади. Бу Пакьяонинг деярли тўрт йиллик танаффусдан кейинги илк профессионал жангидир.

ВБК президенти Маурисио Сулайман 2 май куни айни режани тасдиқлаб: «Бу катта жанг бўлади, ҳозирда Марио Барриос Мэнни Пакьяога қарши майдонга чиқади», дея баёнот берган эди.

46 ёшли Пакьяо сўнгги марта 2019 йил июл ойида Кет Турманга қарши жанг қилиб, WBA чемпионлигини ютганди. Бироқ кейинчалик фаол бўлмагани сабабли мазкур камар ундан тортиб олинган. 2021 йилда у Йорденис Угасга қарши рингга қайтган, аммо бир овоздан қарор билан мағлубиятга учраб, орадан бир ой ўтиб, ижтимоий тармоқлар орқали боксдан кетишини эълон қилган эди.

Фаолиятини якунлагач, Пакьяо кўргазмали жангларда иштирок этди – кореялик жангчи ДК Ёо ҳамда япон кикбоксчиси Рукия Анпога қарши рингга чиқди. У сиёсатга ҳам кириб келиб, 2016–2022 йилларда Филиппин сенатори сифатида фаолият юритди. 2022 йилги президентлик сайловларида эса учинчи ўринни эгаллади. Айни вақтда у Сенат сайловларида яна иштирок этмоқда – сайлов 12 май куни бўлиб ўтади.

Рақиби Марио Барриос эса 2023 йилдан бери WBC камарининг соҳиби. Унинг рекордида 29 ғалаба, 2 мағлубият ва 1 дуранг бор. Сўнгги бор у 2023 йил ноябрда Абел Рамос билан дуранг ўйнаган эди. Қизиғи шундаки, Барриос вақтинчалик WBC камарини айнан Пакьяони нафақага чиқарган Угасни енгиб қўлга киритган.

Мэнни Пакьяо бокс тарихида 8 та вазн тоифасида асосий чемпионлик камарини қўлга киритган ягона боксчи саналади. У умумий ҳисобда 12 маротаба жаҳон чемпиони бўлган ва 62 та ғалаба, 8 мағлубият ҳамда 2 дуранг билан нафақага чиққан.