Filippinlik afsonaviy bokschi Menni Pakyao 19-iyul kuni Las-Vegasda Mario Barriosga qarshi jang oʻtkazadi. ESPN xabariga koʻra, bu bahsda WBC yarimengil vazn toifasi chempionlik kamari oʻynaladi. Bu Pakyaoning deyarli toʻrt yillik tanaffusdan keyingi ilk professional jangidir.

VBK prezidenti Maurisio Sulayman 2-may kuni ayni rejani tasdiqlab: “Bu katta jang boʻladi, hozirda Mario Barrios Menni Pakyaoga qarshi maydonga chiqadi”, deya bayonot bergan edi.

46 yoshli Pakyao soʻnggi marta 2019-yil iyul oyida Ket Turmanga qarshi jang qilib, WBA chempionligini yutgandi. Biroq keyinchalik faol boʻlmagani sababli mazkur kamar undan tortib olingan. 2021-yilda u Yordenis Ugasga qarshi ringga qaytgan, ammo bir ovozdan qaror bilan magʻlubiyatga uchrab, oradan bir oy oʻtib, ijtimoiy tarmoqlar orqali boksdan ketishini eʼlon qilgan edi.

Faoliyatini yakunlagach, Pakyao koʻrgazmali janglarda ishtirok etdi – koreyalik jangchi DK Yoo hamda yapon kikbokschisi Rukiya Anpoga qarshi ringga chiqdi. U siyosatga ham kirib kelib, 2016–2022-yillarda Filippin senatori sifatida faoliyat yuritdi. 2022-yilgi prezidentlik saylovlarida esa uchinchi oʻrinni egalladi. Ayni vaqtda u Senat saylovlarida yana ishtirok etmoqda – saylov 12-may kuni boʻlib oʻtadi.

Raqibi Mario Barrios esa 2023-yildan beri WBC kamarining sohibi. Uning rekordida 29 gʻalaba, 2 magʻlubiyat va 1 durang bor. Soʻnggi bor u 2023-yil noyabrda Abel Ramos bilan durang oʻynagan edi. Qizigʻi shundaki, Barrios vaqtinchalik WBC kamarini aynan Pakyaoni nafaqaga chiqargan Ugasni yengib qoʻlga kiritgan.

Menni Pakyao boks tarixida 8 ta vazn toifasida asosiy chempionlik kamarini qoʻlga kiritgan yagona bokschi sanaladi. U umumiy hisobda 12 marotaba jahon chempioni boʻlgan va 62 ta gʻalaba, 8 magʻlubiyat hamda 2 durang bilan nafaqaga chiqqan.