Фаластин БМТ, Европа Иттифоқи, Россия ва АҚШни ўз ичига олган «Яқин Шарқ тўртлиги» форматини Исроил билан музокаралар учун энг яхши вариант дея маълум қилди. Бу ҳақда Фаластиннинг Россиядаги элчиси Абдел Ҳофиз Нофал айтиб ўтди.

«Биз Квартет Яқин Шарқдаги тинчлик жараёни учун энг яхши вариант деб ҳисоблаймиз», дейди Нофал. Дипломат Исроил-Фаластин можаросини ўта мураккаб масала деб атади ва уни ҳал қилиш учун «Яқин Шарқ тўртлиги» ишини фаоллаштириш, шу жумладан Москвада вазирлар учрашувини ўтказиш муҳимлигини таъкидлади.

Шунингдек, элчи Россиянинг Исроил-Фаластин музокараларини Москвада ўтказиш бўйича ташаббусини мамнуният билан қабул қилди. Аммо Фаластин томони расмий таклифни ҳали олмаганлигини таъкидлади.

«Агар биз таклиф олсак, ушбу учрашувда иштирок этишга тайёрмиз», дейди Нофал.

10 май куни Ғазо секторида жойлашган Фаластиннинг «ХАМАС» ва «Ислом жиҳоди» гуруҳлари Исроилни ўққа тутишни бошладилар. Ўтган вақт ичида жами мамлакат бўйлаб уч мингдан ортиқ ракеталар отилган.

Бунга жавобан Исроил 5000 нафар заҳирадаги аскарни чақирган ва Ғазо секторига ҳаво ҳужумларини уюштирмоқда. Тўқнашувлар ҳали ҳам давом этмоқда. Сўнгги маълумотларга кўра, Фаластин-Исроил можароси бошланганидан бери ўн нафар исроиллик ва 220 нафар Ғазо сектори аҳолиси ҳалок бўлган.