Бугун, 27 ноябрь куни Ўзбекистон Миллий футбол маркази мезбонлиги остида ўтаётган 18 ёшгача бўлган қизлар ўртасидаги «CAFA кубоги» мусобақаси ўз якунига етди.

Кун доирасидаги дастлабки баҳсда Эрон U18 терма жамоаси Туркманистон ўсмирлар жамоасини 1:0 ҳисоби билан мағлуб этди. Ўйинда киритилган ягона голга Маҳдис Ростами муаллифлик қилди. Ушбу ғалаба эвазига Эрон терма жамоаси гуруҳда учинчи ўринга кўтарилиб олди.

Иккинчи баҳсда эса мусобақа пешқадamлари — Ўзбекистон ва Қирғиз Республикаси терма жамоаси қизлари ўзаро куч синашдилар. Учрашувнинг биринчи бўлимида меҳмонлар асосий эътиборини ҳимояга қаратдилар. Натижада бўлимда ҳисоб очилмади.

Иккинчи бўлим бошларида терма жамоамиз сардори Шаҳноза Деканбоева зарбасидан сўнг, Қирғиз Республикаси терма жамоаси посбони катта қийинчилик билан тўпни қайтарди. Қайтган тўпни Ёдгора Юсупова дарвозага жойлаб қўйди.

Иккинчи тайм ўртасида Ўзбекистон U18 терма жамоаси томонидан уюштирилган навбатдаги ҳужум ҳам гол билан якунланди. Бу гал ҳам ҳал қилувчи зарбага Ёдгора Юсупова муаллифлик қилди.

Ўйин якунига 3 дақиқа қолганда Виктория Сирота шогирдлари баҳсдаги сўнгги голни киритди. Шаҳноза Деканбоева қанотдан ёриб кириб, тўпни марказда турган Меҳрангиз Ҳамидовага етказди. Туркманистон билан баҳсда ўйин қаҳрамони деб топилган Меҳрангиз бу сафар Қирғиз Республикаси дарвозасини учинчи бор ишғол этди.

Учрашув 3:0 ҳисоби билан якуниlandi. Баҳсда 2 та гол урган Ёдгора Юсупова CAFA томонидан «Ўйиннинг энг яхши футболчиси» деб топилди.

Ёдгора Юсупова учрашувдан сўнг «Халқ сўзи» нашри учун махсус интервью берди:

«Бугун жуда яхши ўйин ўтказдик. Биз ўтган ўйинда ғалаба қозонгандик ва бу бизга қўшимча куч берди. Ғалабадан хурсандмиз.

Осиё чемпионатида ушбу жамоага мағлуб бўлган эдик. Бугун ана шу мағлубият учун реванш олдик», — деди Юсупова.

Шунингдек, терма жамоамизнинг асосий ҳимоячиси Мубина Бахтиёрова ҳам ўз фикрлари билан ўртоқлашди:

«Биз Осиё кубоги саралашида Қирғиз Республикаси терма жамоасига мағлуб бўлган эдик. Ушбу мағлубият тасодифий бўлганини исботлаш учун қўлимиздан келганича ҳаракат қилдик. Мураббийларнинг барча кўрсатмаларини бажардик ва мана, ниҳоят, бугун йирик ҳисобда ғалаба қозонишга эришдик. Жуда хурсандмиз.

Сўнгги турда Эронга қарши ҳам бугунгидек ўйнашга ҳаракат қиламиз. Умид қиламанки, якуний турда ҳам ғалаба қозониб, мусобақа бош совринини Ўзбекистонда қолдирамиз», — деди Бахтиёрова.

Шу тариқа Ўзбекистон U18 терма жамоаси тўртинчи турда муҳим ғалабага эришиб, мусобақа жадвалида 7 очко билан пешқадамга айланди.

Маълумот учун, Виктория Сирота бошчилигидаги жамоа сўнгги ўйинини 29 ноябрь санасида Эрон ўсмирлар терма жамоасига қарши ўтказади. Ушбу баҳсда қўлга киритиладиган ғалаба Ўзбекистон U18 терма жамоасини мусобақа ғолибига айлантиради.