Bugun, 27-noyabr kuni Oʻzbekiston Milliy futbol markazi mezbonligi ostida oʻtayotgan 18 yoshgacha boʻlgan qizlar oʻrtasidagi “CAFA kubogi” musobaqasi oʻz yakuniga yetdi.

Kun doirasidagi dastlabki bahsda Eron U18 terma jamoasi Turkmaniston oʻsmirlar jamoasini 1:0 hisobi bilan magʻlub etdi. Oʻyinda kiritilgan yagona golga Mahdis Rostami mualliflik qildi. Ushbu gʻalaba evaziga Eron terma jamoasi guruhda uchinchi oʻringa koʻtarilib oldi.

Ikkinchi bahsda esa musobaqa peshqadamlari — Oʻzbekiston va Qirgʻiz Respublikasi terma jamoasi qizlari oʻzaro kuch sinashdilar. Uchrashuvning birinchi boʻlimida mehmonlar asosiy eʼtiborini himoyaga qaratdilar. Natijada boʻlimda hisob ochilmadi.

Ikkinchi boʻlim boshlarida terma jamoamiz sardori Shahnoza Dekanboyeva zarbasidan soʻng, Qirgʻiz Respublikasi terma jamoasi posboni katta qiyinchilik bilan toʻpni qaytardi. Qaytgan toʻpni Yodgora Yusupova darvozaga joylab qoʻydi.

Ikkinchi taym oʻrtasida Oʻzbekiston U18 terma jamoasi tomonidan uyushtirilgan navbatdagi hujum ham gol bilan yakunlandi. Bu gal ham hal qiluvchi zarbaga Yodgora Yusupova mualliflik qildi.

Oʻyin yakuniga 3 daqiqa qolganda Viktoriya Sirota shogirdlari bahsdagi soʻnggi golni kiritdi. Shahnoza Dekanboyeva qanotdan yorib kirib, toʻpni markazda turgan Mehrangiz Hamidovaga yetkazdi. Turkmaniston bilan bahsda oʻyin qahramoni deb topilgan Mehrangiz bu safar Qirgʻiz Respublikasi darvozasini uchinchi bor ishgʻol etdi.

Uchrashuv 3:0 hisobi bilan yakunilandi. Bahsda 2 ta gol urgan Yodgora Yusupova CAFA tomonidan “Oʻyinning eng yaxshi futbolchisi” deb topildi.

Yodgora Yusupova uchrashuvdan soʻng “Xalq soʻzi” nashri uchun maxsus intervyu berdi:

«Bugun juda yaxshi oʻyin oʻtkazdik. Biz oʻtgan oʻyinda gʻalaba qozongandik va bu bizga qoʻshimcha kuch berdi. Gʻalabadan xursandmiz.

Osiyo chempionatida ushbu jamoaga magʻlub boʻlgan edik. Bugun ana shu magʻlubiyat uchun revansh oldik», — dedi Yusupova.

Shuningdek, terma jamoamizning asosiy himoyachisi Mubina Baxtiyorova ham oʻz fikrlari bilan oʻrtoqlashdi:

“Biz Osiyo kubogi saralashida Qirgʻiz Respublikasi terma jamoasiga magʻlub boʻlgan edik. Ushbu magʻlubiyat tasodifiy boʻlganini isbotlash uchun qoʻlimizdan kelganicha harakat qildik. Murabbiylarning barcha koʻrsatmalarini bajardik va mana, nihoyat, bugun yirik hisobda gʻalaba qozonishga erishdik. Juda xursandmiz.

Soʻnggi turda Eronga qarshi ham bugungidek oʻynashga harakat qilamiz. Umid qilamanki, yakuniy turda ham gʻalaba qozonib, musobaqa bosh sovrinini Oʻzbekistonda qoldiramiz”, — dedi Baxtiyorova.

Shu tariqa Oʻzbekiston U18 terma jamoasi toʻrtinchi turda muhim gʻalabaga erishib, musobaqa jadvalida 7 ochko bilan peshqadamga aylandi.

Maʼlumot uchun, Viktoriya Sirota boshchiligidagi jamoa soʻnggi oʻyinini 29-noyabr sanasida Eron oʻsmirlar terma jamoasiga qarshi oʻtkazadi. Ushbu bahsda qoʻlga kiritiladigan gʻalaba Oʻzbekiston U18 terma jamoasini musobaqa gʻolibiga aylantiradi.