АҚШ Давлат котиби Энтони Блинкен Киевга кутилмаган дипломатик ташриф билан келди. У Америка Қўшма Штатлари Украинани қўллаб-қувватлашини яна бир бор таъкидлаб, Украина шимоли-шарқидаги Харков вилоятида янги фронт чизиғини очган рус қўшинларини сиқиб чиқариш учун курашаётганини маълум қилди.

АҚШнинг узоқ кутилган 61 миллиард долларлик ҳарбий ёрдами қабул қилинганидан кейин Қўшма Штатлар расмийси томонидан амалга оширилган биринчи сафар бўлди. Котиб Киевга эрта тонгда поездда етиб келган. Журналистларга анонимлик шарти билан маълумот берган АҚШ расмийсига кўра, Блинкеннинг бу ташрифи оғир вазиятда қолган украиналикларга ишонч сигналини билдириш бўлган.

Давлат департаменти баёнотида айтилишича, Блинкен Украина президенти Володимир Зеленский ва мамлакатнинг бошқа юқори мартабали амалдорлари билан жанг майдонидаги янгиланишлар, АҚШнинг янги хавфсизлик ва иқтисодий ёрдамининг таъсири, Украинанинг иқтисодий тикланишини кучайтириш бўйича олиб борилаётган ишларни муҳокама қилиш учун учрашади. Бу унинг Киевга 2022 йилнинг февралида Россия кенг кўламли босқинини бошлаганидан бери тўртинчи ташрифи бўлди. Энтони Блинкен мамлакатда охирги марта ўтган йилнинг сентябрида бўлган эди.

Душанба куни АҚШ Миллий хавфсизлик бўйича маслаҳатчиси Жейк Салливан Вашингтон Украинага қурол-яроғ етказиб беришни тезлаштиришга уринаётганини айтганди.

— Кечикиш Украинани инқирозга бошлади ва биз уларни бу ҳолатдан имкон қадар тезроқ чиқариб олишимиз керак, — деган Салливан. Шунингдек, шу ҳафта янги қурол пакетини юбориш эълон қилинишини қўшимча қилган. Яна бир АҚШ расмийсига кўра, артиллерия, ҳаво ҳужумига қарши мудофаа воситалари ва узоқ масофага учувчи баллистик ракеталар аллақачон етказилган.