Бош прокуратура ҳузуридаги Иқтисодий жиноятларга қарши курашиш департаменти икки вилоятда электр-энергиясидан ноқонуний фойдаланиш ҳолатлари аниқлангани ҳақида хабар берди.

Маълумотларга кўра, Наманган ва Андижондаги қонунбузарликларда етказилган зарар қарийб 3 миллиард сўмни ташкил этган.

Департаментнинг Чуст тумани бўлими ўтказилган терговга қадар текширувда «Ч.Ш.» МЧЖ масъул шахслари ўзаро тил бириктириб, ишлаб чиқариш ва хизмат кўрсатиш биносида умумий фойдаланишдаги электр тармоғига тижорат мақсадида ўзбошимчалик билан уланиб, жами 2,1 млрд сўмлик электр энергиясидан ноқонуний фойдаланганликларини аниқлади.

Бошқа бир ҳолатда, Департаментнинг Андижон шаҳри бўлими ва «Ўзэнергоинспекция» вилоят бошқармаси ходимлари ҳамкорлигида ўтказилган терговга қадар текширувда «Б.б.» НТМ масъул шахслари ва бошқалар ушбу таълим муассасаси биносини электр тармоғига тижорат мақсадида шартномасиз тўғридан-тўғри улаб, жами 892,2 млн сўмлик электр энергиясидан ноқонуний фойдаланганликлари аниқланган.

Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.