Дубайдан Тошкентга учишга ҳозирлик кўраётган самолёт бортида муштлашув келиб чиқди. Бу ҳақда Транспорт ва туризм объектларида хавфсизлик департаменти хабар берди.

Маълум қилинишича, жорий йилнинг 16 апрель куни Дубай шаҳрида Uzbekistаn Airways авиакомпаниясининг рейси Тошкентга учишга ҳозирлик кўраётган бўлган.

Самолёт эшиклари ёпилган ва трап олиб ташланган, бироқ ноқулай об-ҳаво шароити туфайли парвоз кечиктирилган. Бу вақтда йўловчилардан бири, 45 ёшли Ўзбекистон фуқароси жанжал келтириб чиқарган.

У баланд овозда сўкинган ва самолёт эшикларини очишни талаб қилган. Самолёт экипажи ғазаб отига минган аёл билан мунозара қилишга уриниб кўрган. Бошқа бир йўловчи уни тинчлантиришга уринган, бироқ бу аёллар ўртасида муштлашувга сабаб бўлган.

Шундан сўнг аэропорт полицияси иккала йўловчини ҳам рейсдан олиб чиқиб кетган, бу воқеа учиш вақтининг 2 соатга кечикишига олиб келган. Оқибатда бошқа рейслар жадвали ҳам мажбурий ўзгартирилган ва бу авиаташувчига 5037 доллар миқдорида қўшимча харажатлар келтириб чиқарган.

Транспорт ва туризм объектларида хавфсизлик бошқармаси томонидан йўловчиларга нисбатан терговга қадар текширув ўтказилиб, етказилган зарар тўлиқ қопланган, маъмурий ҳуқуқбузарликлар тўғрисида баённомалар тузилиб, судга юборилган.