Монте-Карлода ўтказилган жангдан сўнг ўзбекистонлик боксчи Муроджон Аҳмадалиев япониялик P4P чемпиони Наоя Иноуени яна бир бор жангга чақирди. Бу чақириқларга Иноуе биринчи бор ўз муносабатини билдирди. У Аҳмадалиевнинг мурожаатига кескин оҳангда жавоб қайтариб, ҳозирги мақсади бошқа эканлигини таъкидлади.

Иноуе ўз жавобида шундай деди: «Нима учун мен Тапалесга ютқазган одамдан қочишим керак? Бунга умуман ҳожат йўқ. Агар жанг қилишни истасанг, ғалабангни «қийматини» ушлаб тур ва кут! Мен ҳозир Гудман билан жангга тайёрланяпман».

Ўз навбатида кунчиқар юрт боксчисининг фикрига қарата журналист Жалол Аҳмедовнинг қуйидаги фикрлари жаҳон бокс ихлосмандлари ўртасида кенг муҳокамаларга сабаб бўлмоқда. «Келинг тан оламиз, МЖ ўша мағлуб бўлган жангида ўзининг асл даражасида эмасди. Ҳар қандай ҳолатда ҳам у жангда ютқазмаганди. Нима учун унда сиз Муроджон мағлуб этган Романга ҳам ютқазган Дохени билан жанг қилдингиз?», деган у.

Эслатиб ўтамиз, Муроджон Аҳмадалиев якшанба тонгида Рикардо Эспинозага қарши жанг ўтказиб, рақибини 3-раундда нокаутга учратган эди. Ушбу ғалаба орқали Аҳмадалиев вақтинчалик WBA чемпионлик камарини қўлга киритди. Бу эса уни яна юқори даражадаги рақибларга, жумладан Наоя Иноуе билан имконият яратишга яқинлаштирди.

Наоя Иноуе айни дамда иккинчи энг енгил вазн тоифасида WBA, WBC, WBO ва IBF камарлари соҳиби ҳисобланади. У 24 декабр куни Токио шаҳрида австралиялик боксчи Сем Гудман билан жанг қилиб, IBF чемпионлик камарини ҳимоя қилишни режалаштирган. Ушбу жангда Иноуе ғалаба қозонса, унинг позицияси янада мустаҳкамланади.

Шунингдек, Аҳмадалиев IBF ташкилотига Иноуега қарши ўз шикоятини киритишини ҳам аввалроқ маълум қилган эди. Бу унинг Наоя Иноуе билан жанг қилиш учун имкониятни расмий йўл билан қўлга киритишга уринишини кўрсатади. Келгусида ушбу икки боксчининг тўқнашуви катта эътибор билан кузатилиши аниқ.