«Водий-Тошкент» йўналишида ҳаракатланиб келаётган Кобальт русумли автомобиль йўловчисининг сумкасидан «гашиш» гиёҳвандлик моддаси топилди. Бу ҳақида Наманган вилояти Ички ишлар бошқармаси хабар берди.

Унда айтилишича, кеча, 4 август куни «Водий-Тошкент» йўналишида ҳаракатланиб келаётган, Андижон вилояти Андижон шаҳрида яшовчи, 1998 йилда туғилган М.А. бошқарувидаги «Cobalt» русумли автомашинаси ИИБ ходимлари томонидан тўхтатилиб текширилганда, автомашинада йўловчи сифатида келаётган, Андижон вилояти Андижон шаҳрида яшовчи, 1998 йилда туғилган О.Ж.га тегишли сумкада 1.64 грамм «Гашиш» гиёҳвандлик моддаси борлиги аниқланган.

Ҳозирда мазкур ҳолат юзасидан Поп туман ИИБ Тергов бўлинмаси томонидан Ўзбекистон Республикаси Жиноят кодексининг 276-моддаси 1-қисми билан жиноят иши қўзғатилиб, ҳозирда тергов ҳаракатлари бошлаб юборилган.

Эслатиб ўтамиз, аввалроқ, Қўрғонтепалик оғуфуруш қирғизистонлик наркосавдогардан сотиб олинган 2 кг «гашиш» моддасини ўз автомашинасида олиб кетаётганда Давлат хавфсизлик хизмати ходимлари томонидан қўлга олингани ҳақида хабар берилган эди.