Вайоминг штати мэрлигига ғайриоддий номзод илгари сурилмоқда. «USA Today» нашрининг ёзишича, ушбу штатда яшовчи 42 ёшли кутубхоначи Виктор Миллер мер лавозимига даъвогарлик учун ариза берди. Унинг номзоди VIC номли чатбот эканлиги кўпчиликни таажжублантирган.

Миллер сунъий интеллект сиёсатчиларидан (инсон) кўра маълумотни яхшироқ таҳлил қилишига ва бошқаришига ишонади. «OpenAI» ширкати эса сиёсий кампанияни тақиқловчи қоидалар ва шартларни бузганлиги сабабли VIC чатботига киришни чеклаб қўйишни муҳокама қилмоқда.

Кутубхоначининг таъкидлашича, VIC катта ҳажмдаги маълумотларни ўқиши ва таҳлил қилиши, инсон сиёсатчиларига қараганда кўпроқ асосли қарорлар қабул қилиши мумкин. Қизиғи шундаки, шаҳарда кутубхоначининг ёндашувини асосли деб ҳисобловчилар ҳам талайгина. Улар агар сайловларда чатбот номзоди бўлса, ҳеч иккиланмай унга овоз беришмоқчи.

VIC’дан ташқари яна беш номзод, жумладан, амалдаги штат мэри Патрик Коллинз бу лавозимга даъвогарлик қилмоқда. Вайоминг штати давлат котиби Чак Грей Миллернинг номзодига қаршилигини билдириб, сунъий интеллект ботларининг сайловда қатнашиши мумкин эмаслигини маълум қилган. Штат давлат котибининг ҳамфикрлари ҳам талайгина. Улар кутубхоначи ва унинг тарафдорларини ақлдан озганликда гумон қилишяпти.

Ларами округи прокуратураси номзодни текширмоқда ва июль ойининг бошигача кўриб чиқишни якунлаши лозим. Шундан сўнггина VIC’нинг сайловларда иштирок этиши ёки этмаслиги маълум бўлади.