Иллюстратив фото

Пайшанба куни Буюк Британия Бош вазири Кер Стармер муҳим масалалар юзасидан гаплашиш учун АҚШда бўлади. Жумладан, АҚШ президентини Дональд Трампни Россия етакчиси Владимир Путиндан узоқлаштириш, тинчлик битимидан кейин Украина учун хавфсизлик кафолатларини олиш ва трансатлантик альянсни сақлаб қолиш муҳокама марказида бўлади. Лекин унинг имкониятлари етарлича бўлмаслиги мумкин. Чунки ҳафта бошида ҳам Франция президенти Эммануэль Макрон худди шу масалалар бўйича Вашингтонга бориб келган эди. Макрон Трамп билан яқинлигини қайта тиклаганига қарамай, аниқ бир келишувларсиз қайтган.

«Бизга ўт очишни тўхтатиш эмас, балки барқарор тинчлик учун хавфсизлик кафолатлари керак», — деган Стармер журналистларга.

Шунингдек, у тинчлик шартномаси тузилган тақдирда Буюк Британия ва Франция Украинага тинчликпарвар кучларни жўнатишга тайёр эканлиги, фақат бунга АҚШнинг ёрдами кераклигини айтган. Чунки ушбу жараёнда логистика, разведка ва самолётга қарши ракета воситаларида Европага ёрдам керак. Агар АЫШ бунга тайёр бўлмаса ва ўт очишни тўхтатишга эришилса, Стармер Путин яна куч тўплаб қайтишига ишонади. Чунки унинг Украинага нисбатан позицияси аниқ. Кер Стармер сешанба куни мамлакат парламентига дунёда ҳамма нарса ўзгарганини тушунтирган.

Ҳозирча Трамп ҳеч қандай батафсил стратегияни эълон қилмади. Фақатгина Украинанинг НАТОга қўшилишини рад этиб, Путин уч йиллик урушда қўлга киритган барча ерларни сақлаб қолишига ишора қилган. Ушбу ҳафта АҚШ БМТнинг Москва урушини қораловчи резолюцияга қарши овоз берганида АҚШнинг ҳаққоний воситачи сифатидаги роли яна шубҳа остида қолди.

Ноёб ер минераллари битими

Шунингдек, АҚШнинг Украинанинг ноёб ер минералларидан фойдаланиш бўйича таклиф этаётган битими юзасидан ҳам чалкашликлар бор.

Трампнинг айтишича, тузилажак битим катта фойда келтириб, Украинага юборилган ёрдам пакетларининг ўрнини қоплайди. Зеленский аввалроқ ушбу шартномани имзолашдан бош тортиб, ажратилган ёрдам грант сифатида берилганини айтган эди. Сўнгги хабарларга кўра, Зеленский битимни имзолаш учун ҳафта охирида Вашингтонга учмоқчи. Бу маълумотларни CNN бермоқда. Украина етакчиси келишув мамлакат хавфсизлиги учун кафолат бўлишини айтган, бироқ CNN матн лойиҳасида бундай мажбуриятлар йўқлигини очиқлаган.

Фақатгина АҚШ «Украинанинг барқарор тинчлиги ўрнатилиши учун зарур бўлган хавфсизлик кафолатларини олиш бўйича ҳаракатларини қўллаб-қувватлайди» дейилган лойиҳа матнида.

Шундай қилиб, Стармер АҚШда катта вазифани бажариши керак. У сўнгги воқеалардан кейин, мудофаа харажатларини оширишга ваъда берган. Бу хабар Трампни ҳайратга солиши қийин. Чунки у НАТО давлатларидан мудофаа харажатларини 5 фоизгача оширишни талаб қилмоқда.