Президентнинг «Давлат божхона хизмати органларининг фаолияти самарадорлигини ошириш бўйича чора-тадбирлар тўғрисида» фармони қабул қилинди.

Фармонга асосан, давлат божхона хизмати органлари фаолияти самарадорлигини оширишнинг асосий мақсадли кўрсаткичлари этиб 2026 йилга қадар божхона декларацияларини инсон омилисиз расмийлаштирув улушини 2 баробарга ошириш, 2028 йилга қадар божхона кўригини 21 фоиздан 15 фоизга тушириш ва 2030 йилга қадар сунъий интеллект элементларидан фойдаланган ҳолда хавфни бошқариш тизими самарадорлигини 2 баробарга ошириш кабилар эканлиги белгиланди.

Шу билан бир қаторда, 2025 йил 1 июлдан бошлаб ветеринария ва фитосанитария соҳасида ташқи савдо юкларига тегишли ҳар қандай ҳужжатларга муҳр ва штамп босиш ҳамда уларни ёзма тарзда рўйхатга олиш амалиёти бекор қилинади, барча тартиботлар ушбу ҳужжатларни электрон шаклда тасдиқлаш орқали амалга оширилади. Товарлар экспортида халқаро шартномаларда қатъий белгиланган ҳолатлар бундан мустасно.

Бундан ташқари, божхона омборида сақлаш муддати тугаган ва 90 кун ичида талаб қилиб олинмаган товарлар суд қарорига кўра давлат эгалигига ўтказилиб, қонун доирасида тасарруф этилади.