АҚШ президенти Дональд Трамп маъмурияти Исроил бош вазири Биньямин Нетаньяҳу Ғазодаги тинчлик режасини издан чиқариши мумкинлигидан хавотирда, деб ёзади The New York Times нашри.

Манбаларнинг таъкидлашича, Оқ уйнинг ҳозирги стратегияси — президентнинг махсус вакили Стив Уиткофф, АҚШ вице-президенти Жей Ди Вэнс ҳамда президентнинг куёви Жаред Кушнер воситачилигида Нетаньяҳуни ҲАМАСга қарши тўлиқ миқёсдаги ҳужумни давом эттиришдан тийиб туришдир.

АҚШ ҳукумати Туркия билан ҳамкорликда Ғазо секторида ҳалок бўлган гаровга олинганларнинг жасадларини қидириш учун махсус гуруҳ тузиш устида ишламоқда.

Аввалроқ Исроил армияси ҲАМАС томонидан ўт очишни тўхтатиш режими бузилгани ҳақида баёнот берган эди. Маълум қилинишича, Ғазо жанубидаги Рафаҳ шаҳри яқинида исроиллик ҳарбийлар ўққа тутилган.

Биньямин Нетаньяҳу сулҳни бузишда ҲАМАСни айблаб, Исроил мудофаа кучларига тегишли чораларни кўриш бўйича топшириқ берди. Шундан сўнг Исроил армияси бутун Ғазо бўйлаб бир қатор нишонларга зарбалар йўллади.

Ҳарбийларнинг маълум қилишича, Рафаҳдаги воқеалар оқибатида икки аскар ҳалок бўлган, яна бири оғир яраланган. ҲАМАС эса ушбу ҳодисага ўзининг алоқаси йўқлигини билдирди.