Архив сурат

Саминжон Ҳусанов/“Халқ сўзи”. Андижон туманида фаолият олиб борувчи “Texno innovator” МЧЖда чиқиндини қайта ишлаш орқали сифатли хўжалик маҳсулотлари ишлаб чиқарилмоқда. Бу ерда тайёрланган гул тувагидан тортиб стол-стулу, ихчам мебелларнинг ҳатто қўшни республикаларда ҳам ўз харидорлари бор.

— Ҳозирда 200 га яқин турдаги пластмасса маҳсулотларини ишлаб чиқармоқдамиз, — дейди корхона менежери Шоҳрух Мирзаев. — Ўтган йили 15 миллиард сўмлик маҳсулот тайёрладик ва унинг тенг ярмини Қирғизистон, Тожикистон ва Қозоғистон республикаларига экспорт қилдик. Бундан ташқари, Андижон вилоятидаги автомобилсозликка ихтисослаштирилган “Климат контроль” МЧЖ, “GM-Ўзбекистон”, “Ўз Донг Янг Ко” сингари қўшма корхоналарга пластмассадан иборат эҳтиёт қисмлари етказиб бермоқдамиз.

Корхона илк ташкил топган кезларда атиги 2 та дастгоҳ ва 5 нафар ишчи ёрдамида қутилар ишлаб чиқариш йўлга қўйилган эди. Айни пайтга келиб 90 нафар ишчилар томонидан бир кунда 100 тонна хом ашёни қайта ишлаш имконияти яратилди.