Arxiv surat

Saminjon Husanov/“Xalq soʻzi”. Andijon tumanida faoliyat olib boruvchi “Texno innovator” MCHJda chiqindini qayta ishlash orqali sifatli xoʻjalik mahsulotlari ishlab chiqarilmoqda. Bu yerda tayyorlangan gul tuvagidan tortib stol-stulu, ixcham mebellarning hatto qoʻshni respublikalarda ham oʻz xaridorlari bor.

— Hozirda 200 ga yaqin turdagi plastmassa mahsulotlarini ishlab chiqarmoqdamiz, — deydi korxona menejeri Shohrux Mirzayev. — Oʻtgan yili 15 milliard soʻmlik mahsulot tayyorladik va uning teng yarmini Qirgʻiziston, Tojikiston va Qozogʻiston respublikalariga eksport qildik. Bundan tashqari, Andijon viloyatidagi avtomobilsozlikka ixtisoslashtirilgan “Klimat kontrol” MCHJ, “GM-Oʻzbekiston”, “Oʻz Dong Yang Ko” singari qoʻshma korxonalarga plastmassadan iborat ehtiyot qismlari yetkazib bermoqdamiz.

Korxona ilk tashkil topgan kezlarda atigi 2 ta dastgoh va 5 nafar ishchi yordamida qutilar ishlab chiqarish yoʻlga qoʻyilgan edi. Ayni paytga kelib 90 nafar ishchilar tomonidan bir kunda 100 tonna xom ashyoni qayta ishlash imkoniyati yaratildi.