Бугун, 5 апрелъ куни Астана шаҳрида профессионал бокс фаолиятидаги 15-жангини ўтказадиган Баҳодир Жалолов «The Ring» нашрига интервью берди, деб хабар қилмоқда Ўзбекистон профессионал бокс федерацияси.

Маълумки, ҳаваскор боксда икки карра Олимпиада чемпиони бўлган супероғир вазн тоифасидаги чарм қўлқоп устаси Баҳодир Жалолов бугун Астанада «Top Rank» промоутерлик компанияси томонидан ташкил этилаётган турнир доирасида украиналик Игор Шевадзускийга қарши рингга кўтарилади.

Баҳодир Жалолов Турки Аль аш-Шейхга тегишли «The Ring» журнали мухбирига берган интервьюсида супероғир вазн тоифасида WBC, WBA ва WBO йўналишлари чемпиони украиналик Александр Усик, шунингдек, британиялик собиқ чемпион Энтони Жошуа билан жанг қилишга тайёрлигини маълум қилган.

«Мен чемпионлик йўлида узоқ йўлни босиб ўтдим. Профессионал боксда ўз олдимга қўйилган мақсадларни амалга ошириш фурсати етиб келди. Имкон қадар тезроқ чемпионлик жангини қўлга киритишни истайман. Мен жаҳон чемпионлик камари учун кечадиган жангларга тайёрман. Усик, Жошуа — улар билан жангга тайёрман», — деган Жалолов «The Ring» журналига берган интервьюсида.

Маълумот учун, бугун Қозоғистоннинг Астана шаҳрида ташкил этиладиган бокс кечасида яна бир боксчимиз, ярименгил вазн тоифасида WBA камари учун собиқ даъвогар Отабек Холматов ҳам рингга кўтарилади.

Боксчилар кеча, 4 апрель куни турнир олдидан вазн ўлчаш ҳамда «face to face» маросимларида иштирок этишган.