Франция пойтахтида ўтказилаётган ёзги Олимпиада ўйинларида ўзбек спортчилари ўз юришларини давом эттирмоқда.

Олимпиаданинг олтинчи кунида 3 та спорт тури бўйича 7 нафар спортчимиз ўз иштирокларини давом эттиради.

Кунни доимгидек академик эшкак эшиш баҳсларида иштирок этаётган Анна Пракатен 12:30 ларда бошлаб беради. Спортчимиз яхши натижа кўрсата олса, медалларга эга чиқиши мумкин.

Дзюдо баҳсларининг бешинчи куни гарчи бизга омадсиз келган бўлса-да, бугун иштирок этадиган спортчиларимиздан умид катта. Хусусан, соат 13:00 дан кейин татамига -100 кг вазн тоифасида Музаффарбек Тўрабоев Қозоғистоннинг машҳур полвони Шарҳанга қарши, -78 кг вазнда Ирисхон Қурбонбоева эса Япония вакиласи, жаҳон дзюдо юлдузи, Такаямага қарши чиқади.

Бокс баҳслари эса биз учун жуда аҳамиятли. Хусусан, 15.50 да бошланадиган -63,5 кг вазнда Руслан Абдуллаев ва Мартинес Рамирес (Мексика), шунингдек, 00:50 дан кейин старт оладиган Лазизбек Муллажонов (-92 кг) ҳамда Азиз Аббес Моҳиддин (Италия) баҳсидаги ғалабалар мамлакатимизга энг камида бронза медалини олиб келиши мумкин.

Шунингдек, аёллар ўртасидаги боксда ҳам қизларимиз ўз иштирокини бошлайди. Соат тахминан 14:15 да бошланиши кутилаётган -50 кг вазн тоифасида Сабина Бобоқулова таиландлик Чутамат Раксатга, 19:50 да эса -66 кг вазнда Навбаҳор Ҳамидова Морелле Маккейн (АҚШ)га қарши рингга чиқади.

«Халқ сўзи» спортчиларимизга омад тилайди.