Fransiya poytaxtida oʻtkazilayotgan yozgi Olimpiada oʻyinlarida oʻzbek sportchilari oʻz yurishlarini davom ettirmoqda.

Olimpiadaning oltinchi kunida 3 ta sport turi boʻyicha 7 nafar sportchimiz oʻz ishtiroklarini davom ettiradi.

Kunni doimgidek akademik eshkak eshish bahslarida ishtirok etayotgan Anna Prakaten 12:30 larda boshlab beradi. Sportchimiz yaxshi natija koʻrsata olsa, medallarga ega chiqishi mumkin.

Dzyudo bahslarining beshinchi kuni garchi bizga omadsiz kelgan boʻlsa-da, bugun ishtirok etadigan sportchilarimizdan umid katta. Xususan, soat 13:00 dan keyin tatamiga -100 kg vazn toifasida Muzaffarbek Toʻraboyev Qozogʻistonning mashhur polvoni Sharhanga qarshi, -78 kg vaznda Irisxon Qurbonboyeva esa Yaponiya vakilasi, jahon dzyudo yulduzi, Takayamaga qarshi chiqadi.

Boks bahslari esa biz uchun juda ahamiyatli. Xususan, 15.50 da boshlanadigan -63,5 kg vaznda Ruslan Abdullayev va Martines Ramires (Meksika), shuningdek, 00:50 dan keyin start oladigan Lazizbek Mullajonov (-92 kg) hamda Aziz Abbes Mohiddin (Italiya) bahsidagi gʻalabalar mamlakatimizga eng kamida bronza medalini olib kelishi mumkin.

Shuningdek, ayollar oʻrtasidagi boksda ham qizlarimiz oʻz ishtirokini boshlaydi. Soat taxminan 14:15 da boshlanishi kutilayotgan -50 kg vazn toifasida Sabina Boboqulova tailandlik Chutamat Raksatga, 19:50 da esa -66 kg vaznda Navbahor Hamidova Morelle Makkeyn (AQSH)ga qarshi ringga chiqadi.

“Xalq soʻzi” sportchilarimizga omad tilaydi.