Франция пойтахтида ўтказилаётган ёзги Олимпиада ўйинларида ўзбек спортчилари ўз юришларини давом эттирмоқда.

-57 кг вазн тоифасида қатнашаётган боксчимиз Абдумалик Ҳалаков Париж Олимпиадаси финалида Қирғизистон вакили Мунарбек Сейитбек ўғлига қарши жанг қилади.

Гап шундаки, Мунарбекка чорак ва ярим финалда секундант мураббий бўлиб берган Акмал Ҳасанов финалда қўшни мамлакат вакили билан бирга чиқмайди. Бу ҳақда Парижда бўлиб турган «Olamsport.com» сайти муҳаррири Азиз Тўхтамуродов шахсан сўраганини маълум қилди.

«Қирғизистонлик боксчига ҳамюртимиз Акмал Ҳасанов секундантлик қилаётганидан хабарингиз бўлса керак. Мураббийдан «финалда ҳам Мунарбекка секундант бўласизми?» деб сўрадим. Жавоб эса қуйидагича бўлди: «Йўқ, Аллоҳга шукр, финалга чиқди. Буёғига энди кучлиси ютсин»», деб ёзди Тўхтамуродов.

Қайд этиш керакки, Акмал Ҳасанов Мунарбекка берган ёрдами учун Қирғиз Республикасининг халқаро жамоат бирлашмаси томонидан «Чингиз Айтматов» медали билан тақдирланганди. Қирғизистонлик боксчи мамлакати тарихидаги боксдан медал оладиган ягона спортчидир.

Финал 10 августдан 11 августга ўтар кечаси соат 00:45 да бошланади.

Аввалроқ, Улуғбек Рашитов ва Ҳасанбой Дўсматовлар икки каррадан Олимпиада олтин медаль соҳиблари бўлган эди.