Ижтимоий тармоқларда Қашқадарё вилоятининг Касби туманидаги «Қоратепа» МФЙ ҳудудида номаълум махлуқ пайдо бўлиб, қўй ва паррандаларни бўғизлаб кетаётгани, 9 та хонадондаги 30 бош қўй жароҳатлангани ҳақида хабарлар тарқалди. «Халқ сўзи» мухбири вазиятни ўрганди.

Ҳолатга ойдинлик киритиш мақсадида «Қоратепа» МФЙ раиси Ҳотам Холматов билан боғландик.

«Касбида махлуқ пайдо бўлибди, деган фикрлар ғирт ёлғон, уйдирма, шов-шув кўтариш учун ўйлаб топилган сохта ахборотлардир. Аслида маҳалламиз ҳудудидаги «Шукрона» кўчасида истиқомат қилувчи Шавкат Чориев хонадонида қўйнинг қўзисини дайди итлар талаб кетишган. Қўй ҳам жароҳат кўрган. Бу ҳақда Шавкат Чориевнинг (Тошкентга ишга кетган) рафиқаси – Шамсия Набиева бизга хабар берди. Биз тезда бориб, қўйни сўйдик ва гўштини кўмиб ташладик. Бор-йўғи шу», деди Холматов.

Ҳ. Холматовнинг қўшимча қилишига кўра, дайди итларни йўқ қилиш мақсадида тумандаги ветеринария бўлимига хат юборилган. Маҳаллада 3980 нафар аҳоли яшайди, 750 хонадон мавжуд. Шов-шувга ўч блогерлар томонидан тарқатилган бу хабарнинг ҳеч қандай асосга эга эмаслиги, ваҳимага берилмаслик борасида аҳоли ўртасида тушунтириш ишлари олиб борилмоқда.

Фахриддин Бозоров,

«Халқ сўзи»