Иллюстратив фото

Смартфонда интернетга киришни икки ҳафтага чеклаш инсон миясини 10 йилга ёшартириши мумкин.

“PNAS Nexus” журналида ўз илмий ишлари натижасини эълон қилган канадалик тадқиқотчилар шундай хулосага келишди. Экспериментда Канада ва АҚШдан 400 нафардан ортиқ кўнгилли иштирок этди. Уларнинг электрон қурилмасига интернетга киришни блоклайдиган махсус илова ўрнатилди, шу билан бирга қўнғироқ қилиш ва хабар юбориш имконияти сақлаб қолинди. 14 кундан кейин синовдан ўтувчиларда диққат бир жойга жамлаш сезиларли ошди —10 ёшга ёшарган одамларга мос даражага тўғри келди.

Бундан ташқари, иштирокчилардан 90 фоизи психоэмоционал ҳолати яхшиланганини маълум қилди. Тадқиқотчилар бу самарани антидепрессантлар таъсири билан таққослашди. Одамлар кўпроқ сайр қилиш, очиқ ҳавода вақт ўтказиш ва юзма-юз мулоқот қилишни бошлади, гаджетлар билан ўтказиладиган умумий вақт эса икки баравар қисқарди.

Тадқиқот муаллифларининг таъкидлашича, ҳатто қисқа муддатга интернетдан воз кечиш ҳам диққатни жамлаш, кайфият ва ўзини умумий ҳис этиш ҳолатига ижобий таъсир кўрсатади. Келажакда тадқиқотчилар жамоаси инсон миясининг турли хил рақамли фаолият турларини чеклашга қандай муносабатда бўлишини баҳолаш учун алоҳида иловаларни, масалан, ижтимоий тармоқларни блоклашни синовдан ўтказишни режалаштирган.