Said Donishev/“Xalq soʻzi”. Jizzax viloyatining Sharof Rashidov tumanidagi ixtisoslashtirilgan maktabda taʼlim tizimi xodimlari uchun muhim voqea — “Mahoratli oʻqituvchi — millat tayanchi” shiori ostidagi IV “Ustozlar milliy forumi” boʻlib oʻtdi.

Unda viloyatning barcha shahar hamda tumanlaridan tashrif buyurgan 220 nafardan ziyod eng ilgʻor, tashabbuskor, yangicha fikrlaydigan tarbiyachi, oʻqituvchi va pedagoglar ishtirok etdi.

Forumda taʼlim mazmunini takomillashtirish, yangi oʻquv rejalari va dasturlarni amaliyotga joriy etish, zamonaviy pedagogik texnologiyalar, ilgʻor metodikalar hamda tadqiqotga asoslangan oʻqitish usullari muhokama qilindi.

Ishtirokchilar yangi oʻquv-metodik majmualar bilan ishlash kompetensiyalarini rivojlantirish boʻyicha amaliy mashgʻulotlarda qatnashdilar. Shuningdek, oʻquvchilarning qiziqish va ehtiyojlariga moslashtirilgan darslar tuzish, ularning faol ishtirokini taʼminlash boʻyicha samarali usullar bilan tanishishdi.

Jizzax forumining oʻziga xos jihati — tadbirning nafaqat umumiy maʼruzalar bilan, balki har bir yoʻnalish boʻyicha alohida shoʻbalarda amaliy mashgʻulotlar tarzida oʻtkazilganidir. Maktabgacha taʼlim, boshlangʻich taʼlim, fan yoʻnalishlari, shuningdek, darsliklar va oʻquv ishlari boʻyicha direktor oʻrinbosarlariga qaratilgan maxsus sessiyalar qatnashchilarning oʻz yoʻnalishiga doir muammo va yechimlarini oʻrinli muhokama qilish imkonini berdi.

Taʼlim sohasidagi islohotlarni mahalliy sharoitga moslashtirish, ilgʻor tajribani amaliyotga tatbiq etish va ustozlar oʻrtasida samarali hamkorlik muhitini yaratish — jizzaxlik ustozlar forumning boshqa viloyatlarda oʻtkazilgan tadbirlardan asosiy farqli jihati boʻldi.