Joriy yilning 6-iyun kuni Bolalar ombudsmaniga 2000-yilda tugʻilgan А.А. (ayol) dan murojaat kelib tushdi, deya yozmoqda Bolalar ombudsmani Surayyo Rahmonova.

Qayd qilinishicha, murojaatda ota-onasi vafot etgani, shundan keyin, 2006-yilda va 2012-yilda tugʻilgan singillari Qozogʻistonda yashovchi amakisiga vasiylikka berilganini maʼlum qilgan.

Ayolning aytishicha, amakisi singillariga nisbatan uyatsiz-buzuq harakatlar sodir qilgan. Shu sababli, amakisiga nisbatan qonuniy chora koʻrishni hamda singillarini Oʻzbekistonga qaytarib, oʻzini qonuniy vakil etib tayinlanishida amaliy yordam soʻragan.

Xabarga koʻra, ikki davlatning mutasaddi idoralari hamkorligida 8-iyun kuni erkak Qozogʻiston politsiyasi tomonidan ushlangan. Voyaga yetmagan qizlar Olmaota shahri adaptatsiya markaziga joylashtirilgan, ularga ijtimoiy-psixologik koʻmak koʻrsatilayotgani taʼkidlanmoqda.

Erkakka nisbatan Qozogʻiston Jinoyat kodeksi 121-moddasi (Jinsiy xarakterdagi zoʻravonlik harakatlari) bilan jinoyat ishi qoʻzgʻatilib, qamoqqa olish ehtiyot chorasi qoʻllangan.

Maʼlum qilinishicha, Bolalar ombudsmani, IIV va TIV tomonidan voyaga yetmagan qizlarni Oʻzbekistonga qaytarish choralari koʻrilmoqda.