Navoiy viloyatida fuqaroga yuqorida ishlovchi tanishlari borligini aytib, uning ishonchiga kirib haydovchilik guvohnomasi olib bermoqchi boʻlgan shaxs ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Bosh prokuratura huzuridagi Departamentning Gʻozgʻon shahri boʻlimi tomonidan oʻtkazilgan tezkor tadbirda fuqaro T.Sh. fuqaro F.Gʻ.ning ishonchiga kirib, unga goʻyoki yuqori lavozimda ishlovchi tanishlari yordamida “V” toifadagi haydovchilik guvohnomasini olib berishini aytib, evaziga 1 200 AQSH dollari soʻragan. Fuqaro T.Sh. 1 200 AQSH dollarini olgan vaqtida ashyoviy dalillar bilan ushlangan.

Shu kabi, Departamentning Kattaqoʻrgʻon shahri boʻlimi va boshqa huquqni muhofaza qiluvchi organlar hamkorligida oʻtkazilgan tezkor tadbirda fuqaro M.J. fuqaro B.Sh.ning ishonchiga kirib, unga haydovchilik guvohnomasini olib berishi evaziga 600 AQSH dollarini olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qoʻzgʻatilib, tergov harakatlari oʻtkazilmoqda.