Foto: Toshkent viloyati ekologiya boshqarmasi

Ijtimoiy tarmoqlarda Yangiyoʻl tumani Tuyabugʻuz MFYda yashovchi fuqaro uyida parvarish qilayotgan zaharli ilonlarni koʻchaga qoʻyib yuborgani aytilgan videolar tarqaldi. Toshkent viloyati Ekologiya boshqarmasi holat yuzasidan munosabat bildirdi.

“Joriy yilning 2-oktyabr kuni Yangiyoʻl tumani Tuyabugʻuz MFY hududida fuqaroning xonadonida saqlangan kobra ilonlarni qoʻyib yuborilganligi holati boʻyicha tuman Ekologiya boʻlimi, tuman Ichki Ishlar boʻlimi, tuman Favqulodda vaziyatlar boʻlimi, tuman Veterinariya va chorvachilikni rivojlantirish boʻlimi, tuman Sanitariya-epidemiologik osoyishtalik va jamoat salomatligi xizmati, tuman Obodonlashtirish boʻlimi xodimlari hamda MFY raisi va faollardan iborat ishchi guruh tuzildi”, deyiladi xabarda.

Aniqlanishicha, 40 yoshli N.Y. oʻzi yashayotgan xonadonida 30 dan ortiq “Osiyo kobra” ilonlarini tegishli ruxsatnomalarsiz saqlab kelgan. Nomaʼlum sabablarga koʻra, u ilonlarni ochiqqa qoʻyib yuborgan. Holat mahalliy aholi tomonidan aniqlanib, xususan, 2 ta ilon tutib oʻldirilgan.

Qayd etilishcha, hozirda mazkur holat boʻyicha tuman Ekologiya boʻlimi, IIB, FVB, SES, Obodonlashtirish, Veterinariya va chorvachilikni rivojlantirish boʻlimi hamda mahalla vakillaridan iborat ishchi guruh tuzilgan.

Ular shu yaqin atrofda yashovchi aholi xonadonlarida dorilash ishlarini olib bormoqda. Fuqarolardan uy hayvonlarini vaqtincha tutqunlikda saqlab turish tavsiya qilindi.

Fuqaroga nisbatan IIB xodimlari tomonidan dastlabki surishtiruv ishlari olib borilmoqda.