Foto: «Xalq soʻzi»

Qashqadaryo viloyati Yakkabogʻ tumanida ilk marotaba bemorda endoprotezlash jarrohlik amaliyoti oʻtkazildi.

67 yoshli Chinni momo Ismatova oʻtgan yili uyda yiqilib, son suyagi boʻyinchasining sinishi oqibatida yurolmay qolgandi.

Unda tumanning oʻzida oʻng son suyagini total endoprotezlash operatsiyasi muvaffaqiyatli yakunlandi. Ayni paytda bemorning ahvoli yaxshi, u yana mustaqil qadam tashlay boshladi.

— Avval bunday amaliyotlar poytaxtda yoki ayrim viloyat markazlaridagina oʻtkazilgan boʻlsa, bugun chekka hududlardagi shifoxonalar ham eng zamonaviy texnologiyalar bilan jihozlanib, ularda murakkab turdagi tibbiy amaliyotlarni bajarish imkoniyatlari yaratilmoqda, — deydi viloyat sogʻliqni saqlash boshqarmasi axborot xizmati rahbari Nuriddin Egamov. — Masalan, mart oyi boshida viloyat koʻp tarmoqli tibbiyot markazida Qashqadaryoda ilk bor tizza boʻgʻimini endoprotezlash amaliyoti oʻtkazilgan edi. Mana endi bu turdagi amaliyot Yakkabogʻda ham muvaffaqiyatli amalga oshirildi.

Jahongir BOYMURODOV, “Xalq soʻzi”.