Oʻzbekiston Respublikasi Vazirlar Mahkamasining 2025-yil 2-maydagi 290-sonli qaroriga muvofiq, 2025-yil 15-maydan boshlab “Work and Travel” xalqaro dasturlari doirasida ishlash va sayohat qilish maqsadida xorijiy davlatlarga boradigan talabalarga ssuda (qaytarish sharti bilan foizsiz qarz) ajratish tartibi joriy etiladi. Mazkur tartib xorijga borish, qaytish va boshqa xarajatlarni qoplash uchun moʻljallangan.

Ssuda olish imkoniyati Yevropa Ittifoqi davlatlari, Janubiy Koreya, Yaponiya, Buyuk Britaniya, AQSH, Kanada, Avstraliya va Yangi Zelandiya kabi mamlakatlar uchun amal qiladi. Har yili 2 ming nafargacha talabaga BHMning 40 baravari miqdorida foizsiz ssuda ajratilishi koʻzda tutilgan. Arizalar Davlat xizmatlari markazlari yoki Yagona interaktiv davlat xizmatlari portali (my.gov.uz) orqali qabul qilinadi.

Ssuda soʻrayotgan talabalardan bir qator hujjatlarni taqdim etish talab qilinadi. Ular qatorida xorijdagi ish beruvchi bilan tuzilgan mehnat shartnomasi, kafil shaxsning soʻnggi 12 oylik ish haqi toʻgʻrisidagi maʼlumot va qarz shartnomasi boʻyicha kafillik roziligi (agar mavjud boʻlsa), shuningdek, viza nusxasi ham ilova qilinishi kerak boʻladi.

Ssudani olgan talabalar xorijdan qaytganidan soʻng 1 oy muddat ichida ushbu mablagʻni toʻliq qaytarishi shart. Bundan tashqari, 1 kalendar yili mobaynida 2 ming nafar ariza beruvchiga ssuda ajratilishi maʼqullangandan keyin arizalarni qabul qilish toʻxtatiladi. Bu limitga kirmagan shaxslar kelgusi yilda arizani qaytadan topshirishlari lozim boʻladi.

Ssuda ajratish tizimi orqali talabalarga moliyaviy yordam koʻrsatish bilan birga, ularning xalqaro tajriba orqali shaxsiy va kasbiy oʻsishini qoʻllab-quvvatlash maqsad qilingan. Bu orqali mamlakat yoshlari xorijiy bozorda tajriba toʻplab, kelajakda ichki mehnat bozorida oʻz oʻrnini topishiga zamin yaratiladi.