UzAuto Motors 25-dekabr kuni Toshkentda Chevroletʼning toʻrtta yangi modeli taqdimotini oʻtkazishni rejalashtirmoqda. Bu haqda Spot.uz manbasi xabar berdi.

Kompaniya taklifnomasida qayd etilishicha, mazkur modellar ilgʻor texnologiyalari va jozibador dizayni bilan barchani hayratga soladi.

Manbaga koʻra, gap Equinox, Traverse, Trailblazer va Onix rusumlari haqida ketyapti. Buni boshqa omillar ham tasdiqlaydi. Masalan, oktyabr oyida AQSH kompaniyasi mamlakatimizda Onix tovar belgisini roʻyxatda oʻtkazgan edi.

Oktyabrda esa GM Thailand Oʻzbekistonga Trailblazer modelining birinchi turkumini yuborgani maʼlum boʻlgandi. Shu oyning oxirida esa tarmoqlarda Oʻzbekistondagi Equinox fotosuratlari paydo boʻldi.

Traverse rusumi esa bahor faslida davlat rahbarining Andijon viloyatiga tashrifi doirasida namoyish etilgandi. Aytgancha, oʻsha yerda Equinox va Trailblazer ham bor edi.