Foto: Xalq so‘zi

Урганч шаҳрида мамлакатимиз Қуролли Кучлари ташкил этилганининг 31 йиллиги ҳамда 14 январь – Ватан ҳимоячилари кунига бағишлаб «Миллий армиямиз –Янги Ўзбекистоннинг мустаҳкам қалқонидир!» шиори остида ҳарбий-ватанпарварлик фестивали ўтказилди.

Хоразм вилоят ҳокимлиги ва Шимолий-ғарбий ҳарбий округи қўмондонлиги ҳамкорлигида ташкил қилинган тадбирда ёшлар, ҳарбийлар, уларнинг оила аъзолари, кенг жамоатчилик вакиллари иштирок этди.

Фестивалда Хоразм вилоят ҳокими вазифасини бажарувчи, ҳарбий-маъмурий сектор раҳбари Жўрабек Рахимов ва Шимолий-ғарбий ҳарбий округ қўшинлари қўмондони Фарход Шерматов сўзга чиқиб, бугун ўсиб келаётган ёш авлодни она Ватанга садоқат руҳида тарбиялаш, шунинг баробарида Қуролли Кучларимиз учун етук малакали кадрлар тайёрлаш борасида олиб борилаётган ишлар хусусида тўхталдилар.

Фестивалда ҳарбий парад, замонавий қурол-аслаҳа ва техникалар кўргазмаси, ҳарбий оркестр ҳамда ҳарбий хизматчиларнинг бетакрор чиқишлари намойиш этилди. Югуриш марафони ва қатор спорт турлари бўйича ўтказилган мусобақалар ғолибларига диплом ҳамда қимматбаҳо совғалар топширилди.

Одилбек Одамбоев, «Халқ сўзи».