Foto: Videodan kadr

Avvalroq Qarshi davlat universiteti hududida bir erkak oʻziga tanish boʻlgan qizni bir necha marta pichoqlagani, soʻng esa oʻziga pichoq urgani haqida xabar bergan edik.

“Xalq soʻzi” ijtimoiy tarmoqlarda mazkur jinoyat aks etgan videolar ostiga qoldirilgan izohlarni tahlil qildi. Ularda aytilishicha, Qarshi davlat universiteti talabasi boʻlgan С.Т. (qiz) va Э.М. bunga qadar unashtirilgan boʻlgan. Biroq keyinchalik ayrim sabablarga koʻra ularning orasiga sovuqchilik tushib, unashtiruv bekor qilingan.

Shundan soʻng erkak universitetga borgan hamda 4-bosqich talabasi boʻlgan sevgilisini yoniga chaqirib, u bilan oʻzaro tortishgan va OTMning 2-oʻquv binosi oldida qizga pichoq bilan 8 bor zarba bergan.

“Hudud” informatsion dasturida maʼlum qilinishicha, jabrlanuvchi qizning otasi ham yuqoridagi gaplarni tasdiqlagan.

“Ularni oʻrtasida kelishmovchilik boʻlgan, degan gaplar tarqaldi, aksincha bir oy davomida yigit qizimga tazyiq oʻtkazib kelgan. Biz uni bilib qolganimizdan soʻng unashtiruvni bekor qildik. Men u bolaga toʻgʻrilikcha tushuntirdim, oʻgʻlim hozirdan shu ahvol boʻlsa, men qizimni senga berolmayman, dedim”, deydi qizning otasi.

Uning qoʻshimcha qilishicha, bu voqealardan keyin qizini himoya qilish uchun universitet imtihonlariga oʻzi olib kelib yurgan.

Manbaga koʻra, hozirda shifoxonada davolanayotgan har ikkala fuqaroning ham ahvoli qoniqarli.

“Soat 9:00 lar atrofida bizga 2 nafar bemor olib kelindi. Ogʻir ahvolda boʻlgani uchun toʻgʻridan-toʻgʻri operatsion boʻlimga olindi. Kerakli tekshiruvlar oʻtkazilib, jarohatlari tikildi. Hozirda bemorlarning ahvoli barqaror. Hozirgi kunda ulardan biri xirurgiya boʻlimida, ikkinchisi esa reanimatsiya boʻlimida standart boʻyicha davo muolajalarini olib kelmoqda”, deydi bemorlarni qabul qilgan shifokor.

Taʼkidlash kerakki, hozirda Э.М.нинг harakatlarida Jinoyat kodeksining 25,97-moddasi 1-qismida koʻrsatilgan jinoyat alomatlari mavjudligi sababli unga nisbatan shu modda bilan jinoyat ishi qoʻzgʻatilgan. Gumonlanuvchi shaxs sodir etgan holat boʻyicha prokuratura tomonidan dastlabki tergov harakatlari olib borilmoqda.