Фото: Видеодан кадр

Ижтимоий тармоқларда Қашқадарёда бир эркак бошқа фуқарони бир неча марта пичоқлагани, сўнг эса ўзига пичоқ ургани акс этган видеолар тарқалди. Ҳолат юзасидан вилоят прокуратураси расмий муносабат билдирди.

Маълум қилинишича, ҳолат жорий йилнинг 22 июнь куни соат 08:30 ларда Қарши давлат университети ҳудудида содир бўлган. Гап шундаки, фуқаро М.Э ўзига олдиндан таниш бўлган С.Т. (Қарши дав. университети талабаси) билан университет ҳудудида ўзаро жанжаллашиб, С.Т.нинг турли тана соҳаларига ёнида бўлган пичоқни 8 маротаба санчиб, оғир тан жароҳати етказган.

Шундан сўнг фуқаро М.Э. ўзининг қорин бўшлиғига пичоқ санчиб, ўзига-ўзи тан жароҳати етказган.

Ҳолат юзасидан Қарши шаҳар прокуратураси томонидан фуқаро М.Э.га нисбатан Жиноят кодексининг 25, 97-моддаси 1-қисми билан жиноят иши қўзғатилган.

«Жабрланувчи ҳозирда шифохонада тиббиёт ходимлари назорати остида даволанмоқда. Гумонланувчи шахс процессуал тартибда ушланган», дейилади хабарда.

Қўшимча қилинишича, жиноят иши бўйича дастлабки тергов ҳаракатлари шаҳар прокуратураси томонидан олиб борилмоқда.