Fransiya poytaxtida oʻtkazilayotgan yozgi Olimpiada oʻyinlarida oʻzbek sportchilari oʻz yurishlarini davom ettirmoqda.

Chorak finalda magʻlub boʻlgan ikki kurashchimiz bronza uchun kurashadigan boʻldi. Yunon-rum kurashi qoidasiga koʻra, chorak finalda yutgan kurashchi finalga chiqsa, oʻtish bahslarida 3-oʻrin uchun maydonga chiqadi.

Olimpiadada -77 kg vazn toifasida yurtimiz sharafini himoya qilayotgan Aram Vardanyan yaponiyalik Nao Kusakaga magʻlub boʻlgandi. Kusaka finalga chiqdi va kurashchimizga ham imkoniyat yaratib berdi.

Endi Vardanyan ertaga oʻtish bahsida Jazoir vakili Abdelkrim Uakaliga qarshi kurashadi. Ushbu bahsda gʻalaba qozongan kurashchi esa bronza uchun armanistonlik Malxas Amoyanga qarshi chiqadi.

97 kg vazn toifasida armanistonlik Artur Aleksanyan finalga chiqdi. Maʼlumki, Rustam Assakalov 5:9 hisobida aynan Arturga alamli magʻlubiyatga uchragan edi.

Endi hamyurtimiz Rustam Assakalovda ham bronza uchun kurashish imkoniyati paydo boʻldi. Endi Assakalov ertaga oʻtish bahsida Koreya Respublikasi vakili Kim Seung Jungga qarshi kurashadi.

Ushbu bahsda gʻalaba qozongan sportchi esa bronza uchun kubalik Gabriel Alexandro Kindelan bilan bahs olib boradi.

Avvalroq, yunon-rum kurashchimiz Islomjon Bahromov esa shimoliy koreyalik kurashchiga magʻlub boʻlib, musobaqani yakunlagandi.