Foto: AP

AQSH prezidenti Donald Tramp va biznesmen Ilon Mask oʻrtasidagi mojarodan AQSH vitse-prezidenti Jey Di Vens foyda koʻradi. Bu fikrlarni “Sunday Times” yozmoqda.

“Respublikachilar doiralarida Tramp va Mask ziddiyatga kirishganida, vitse-prezident bundan yuqoriga koʻtarila olgani eʼtibordan chetda qolmadi. Ayni paytda Vens 2028-yilda ham “Make America Great Again” (“Amerikani yana buyuk qilish” — Tramp harakati shiori) saqlab turish uchun hammaga yoqimli hisoblanadi”, deyiladi nashr maqolasida.

Maqola muallifining qayd etishicha, Vashingtondagi kayfiyat juda tez oʻzgarib bormoqda, bu esa Respublikachilar partiyasining boʻlinishiga va 2028-yilgi AQSH prezidentlik saylovlarida demokratlarning gʻalabasiga olib kelishi mumkin.

Tramp va Mask oʻrtasidagi ziddiyat

Oʻtgan haftada tadbirkor AQSH Hukumat samaradorlik Departamenti rahbari lavozimini tark etdi.

Kuni kecha u Tramp tomonidan ilgari surilgan yirik byudjet loyihasini qattiq tanqid qilib, uni “jirkanchlik” deb atadi.

Oq uy rahbari hafsalasi pir boʻlganini aytib, Mask uchun koʻp ish qilganini taʼkidladi, tadbirkor esa unga javoban Trampni prezident saylovida gʻalabasiga katta hissa qoʻshganini pesh qildi.

Payshanba kuni Tramp byudjetdan milliardlab dollarni tejash maqsadida biznesmen kompaniyalariga endi davlat subsidiyalari va shartnomalar bermaslikni taklif qildi.

Prezidentning subsidiyalarni bekor qilish taklifidan soʻng Mask “SpaceX” darhol “Dragon” kosmik kemasini foydalanishdan chiqarishni boshlashini aytdi, biroq tez orada u bu fikridan qaytdi. Mask, shuningdek, Trampga impichment eʼlon qilishga chaqirdi va uni vitse-prezident Jey Di Vens bilan almashtirishni taklif qildi. Oʻzaro kelishmovchilikdan soʻng, “Tesla” aksiyalari Uoll-strit birjasidagi savdolar ochilishida deyarli 14 foizga arzonlashdi.