Toshkent viloyatining Qibray tumanida joylashgan osh markazi va doʻkon yonib ketdi. Favqulodda vaziyatlar vazirligi hodisa yuzasidan maʼlumot berdi.

Bildirilishicha, bugun, 10-dekabr kuni soat 03:49 da Toshkent viloyati FVBga Qibray tumani, Gʻafur Gʻulom MFY, A.Navoiy koʻchasida joylashgan masʼuliyati cheklangan jamiyatlarning birida (osh markazi) yongʻin sodir boʻlayotganligi haqida xabar kelib tushgan.

Xabarga asosan, 16 ta yongʻin-qutqaruv ekipaji soat 03:54 da hodisa joyigi yetib borib, yongʻin soat 05:10 da oʻrab olingan va soat 05:50 toʻliq oʻchirilgan.

“Hodisa oqibatida tan jarohati olgan va vafot etganlar yoʻq. Hozirda yongʻinning kelib chiqish sababi va moddiy zarar miqdori aniqlanmoqda”, deyiladi xabarda.

Qoʻshimcha qilinishicha, voqea joyiga Favqulodda vaziyatlar vazirining birinchi oʻrinbosari-Shtab boshligʻi polkovnik S.T. Zuparov, viloyat FVB rahbariyati hamda tegishli tashkilotlar rahbar xodimlari yetib borgan.