Toshkent viloyati Ohangaron tumanida Gentra, Damas va Chery rusumli avtomobillari ishtirokida yoʻl-transport hodisasi sodir boʻldi. Bu haqda YHXB axborot xizmati xabar berdi. 

Qayd etilishicha, hodisa kecha, 31-may kuni soat taxminan 17:00 larda Ohangaron tumani hududidan oʻtgan xalqaro ahamiyatga ega A373 “M39 avtoyoʻli - Guliston - Boʻka - Angren - Qoʻqon va Andijon orqali – Oʻsh” avtomobil yoʻlining 165-kilometrida sodir boʻlgan.

1964-yilda tugʻilgan R.A. boshqaruvidagi “Damas” rusumli transport vositasida ikkinchi darajali yoʻldan asosiy yoʻlga qoʻshilayotgan vaqtida “Vodiy-Toshkent” yoʻnalishida harakatlanib kelayotgan haydovchilar – 1977-yilda tugʻilgan X.B. boshqaruvidagi “Gentra” va 1987-yilda tugʻilgan Yu.D. boshqaruvidagi “Chery rusumli transport vositalari bilan toʻqnashib, yoʻl transport hodisasi sodir etgan.

YHXBga koʻra, haydovchi va yoʻlovchilarga birinchi tibbiy yordam koʻrsatilgan. Ogʻir tan jarohati va vafot etganlar yoʻq.

Hozirda holat yuzasidan Ohangaron tumani IIB YHXB tomonidan surishtiruv ishlari olib borilmoqda.