Afgʻoniston oliy rahbari va Tolibon harakati yetakchisi Haybatulloh Ohundzoda yangi Jinoyat-protsessual kodeksni tasdiqladi. Mazkur hujjat Ravadari huquqni himoya qilish tashkilotining rasmiy saytida eʼlon qilindi.

Mutaxassislar fikricha, yangi meʼyorlar jins, din va ijtimoiy qatlamlar boʻyicha kamsitishni amalda mustahkamlaydi, shuningdek, qullikka oʻxshash amaliyotlar, boshqacha fikrlaydiganlarga nisbatan jazolash va zoʻravonlikni, ayniqsa, ayollar va bolalarga nisbatan zoʻravonlikni qonuniylashtiradi.

Huquq himoyachisi Bilkis Ahmadiy taʼkidlashicha, kodeks qoidalari shunday tarzda tuzilganki, unda hayvonlar huquqi ayollar huquqiga nisbatan yaxshiroq himoya qilingan.

Aniq moddalar inson huquqlari va feministik tashkilotlar eʼtiborini oʻziga jalb qildi. Xususan, 32-moddada shunday deyiladi:

“Agar er xotiniga oʻta ogʻir kaltak yetkazib, suyak sinishi, jarohat yoki koʻkarishlarga sabab boʻlsa va xotin sudya oldida shikoyati asosli ekanini isbotlasa, er jinoyatchi deb topiladi. Sudya uni 15 kunlik qamoq jazosiga hukm qilishi kerak”.

70-moddada esa boshqacha jazo belgilangan:

“Hayvonlarni (itlar, tuyalar, qoʻylar va shu kabilar) yoki qushlarni (tovuqlar, bedanalar, kekliklar) urushtirgan shaxs jinoyatchi deb topiladi. Sudya uni besh oy muddatga ozodlikdan mahrum etishi kerak”.

Shu tariqa, xoʻroz urushlarini uyushtirish tan jarohatiga olib kelgan xotinni kaltaklashga nisbatan ogʻirroq jinoyat sifatida baholanmoqda.

Huquq himoyachilari taʼkidlashicha, yangi kodeks butun dunyoda asosiy deb hisoblanadigan bir qator huquqiy tamoyillarni inkor qiladi: sud muhokamasining tortishuvliligi va toʻlaqonli himoya huquqi, qonuniylik tamoyili, jazoning qilmishga mutanosibligi, qonun oldida tenglik, aybsizlik prezumpsiyasi va boshqalar.