Oliy Majlisi Senatining kengashi prezident taqdimnomasiga muvofiq Oʻzbekiston Markaziy banki boshqaruvi raisi lavozimiga Timur Ishmetovni tayinlash toʻgʻrisida qaror qabul qilindi.

Timur Aminjonovich Ishmetov (1979-yilda tugʻilgan) bakalavriatni Toshkent moliya institutining moliya-kredit fakultetida (2000), magistraturani esa Birmingem universitetining International Money and Banking yoʻnalishida tamomlagan (2005). Shuningdek, Ishmetov Toshkent davlat yuridik universitetining huquqshunoslik fakultetini tamomlagan (2007).

Ishmetov mehnat faoliyatini 2000-yilda Markaziy bankda iqtisodchi sifatida boshlagan, u yerda turli lavozimlarda, jumladan, Monetar operatsiyalar departamenti, Xalqaro zahiralarni boshqarish departamenti, Ichki valyuta bozori operatsiyalari departamenti hamda valyutani tartibga solish va nazorat departamenti boshligʻi lavozimlarida ishlagan.

U 2017−2019-yillarda Markaziy bank raisining birinchi oʻrinbosari lavozimida ishlagan. 2019-yil may oyidan 2020-yil fevralida vazir etib tayinlangunicha Moliya vazirining birinchi oʻrinbosari lavozimida ishlab kelgan.