“Xalq soʻzi”da “Eng yaxshi maqolalar” tanlovi gʻoliblari ragʻbatlantirildi

15:49 04 Dekabr 2021 Jamiyat
2789 0

Bugungi kunda mamlakatimiz taraqqiyotini yangi bosqichga koʻtarishda har bir vazirlik va idoralar, jamoat tashkilotlari, fuqarolar faol ishtirok etib, uning ravnaqini taʼminlashga munosib hissa qoʻshmoqda. Albatta, ushbu jarayonlarda ommaviy axborot vositalari, xususan, bosma nashrlarning ham alohida oʻrni bor, desak, mubolagʻa boʻlmaydi.

Matbuot — davr va zamonning, hayotning maʼnaviy koʻzgusi. Axborot sohasini tubdan isloh qilishga qaratilayotgan eʼtibordan matbuot ham bebahra emas.

Bugungi kunda dunyo shiddat bilan oʻzgaryapti. Barcha sohada axborot olish va uni yetkazish, taʼsirchan jamoatchilik fikrini shakllantirish hayotiy zaruratga aylangan. Bunday murakkab sharoit oldimizga yangidan-yangi vazifalarni qoʻymoqda. Shulardan kelib chiqib, yurtimizda Prezidentimiz rahnamoligida ommaviy axborot vositalarini rivojlantirish boʻyicha keng koʻlamli islohotlar amalga oshirilayotir.

Bosma nashrlarning boshqa axborot vositalaridan ajralib turadigan jihati borki, u voqealar jarayonini avlodlardan avlodlarga yetkazuvchi tarixiy manba hisoblanadi. Matbuot nafaqat bugungi kun panoramasini toʻliq koʻrish va kuzatish, balki kelgusidagi istiqbolni ham yaqqol tasavvur qilishga yordam beradi. Bugungi islohotlarning tub mohiyatini keng jamoatchilikka ochiq-oshkora, tushunarli tarzda yetkazuvchi ham — matbuotdir.

Shu maʼnoda, 2021-yil boshida “Xalq soʻzi” va «Narodnoye slovo» gazetalari tahririyati tomonidan “Eng yaxshi maqolalar” tanlovi eʼlon qilingan edi. Oʻtgan davr mobaynida mazkur tanlovga ellikdan ortiq ijodiy ishlar qabul qilindi.

Hakamlar hayʼati tomonidan ushbu gazetalar sahifalarida bugungi kungacha chop etilgan ijodiy materiallar koʻrib chiqilib, ular orasidan mamlakatimizda olib borilayotgan shiddatli islohotlar koʻlami tahliliy, qiziqarli, taʼsirchan, samimiy hamda sodda tilda aks ettirilgan eng yaxshi maqolalar saralab olindi.

Tahririyatda 8-dekabr — Oʻzbekiston Respublikasi Konstitutsiyasi qabul qilinganligining 29 yilligi arafasida mazkur tanlov gʻoliblarni taqdirlash marosimi boʻlib oʻtdi.

Foto: “Xalq soʻzi” / Sirojiddin Vohidov

Marosimda “Xalq soʻzi” va «Narodnoye slovo» gazetalari bilan muntazam ravishda hamkorlik qilib, dolzarb mavzulardagi tahliliy-tanqidiy maqolalari bilan faol ishtirok etib, gʻoliblikni qoʻlga kiritganlar munosib ragʻbatlantirildi.

Quyida tanlov gʻoliblari bilan tanishasiz:

1. Bahodir Sobirov, Navoiy davlat pedagogika instituti rektori.

2. Alisher Usmonqulov, Jizzax politexnika instituti rektori.

3. Ilhom Sobirov, Toshkent toʻqimachilik va yengil sanoat instituti rektori.

4. Odil Abdurahmonov, Toshkent transport universiteti rektori.

5. Janpolat Kudaybergenov, Yodju texnika instituti rektori.

6. Bahrom Abdullayev, Urganch davlat universiteti rektori.

7. Bayram Otemuratov, Nukus davlat pedagogika instituti rektori.

8. Xudoynazar Yunusov, Samarqand veterinariya meditsinasi instituti rektori.

9. Sadirdin Xudoyqulov, Toshkent davlat iqtisodiyot universiteti prorektori.

10. Mahmudjon Boltaboyev, Oʻzbekiston davlat jismoniy tarbiya va sport universiteti rektori.

11. Ilhomjon Toʻxtasinov, Samarqand davlat chet tillari instituti rektori.

12. Gʻofurjon Muhamedov, Chirchiq davlat pedagogika instituti rektori.

Eslatib oʻtamiz, tanlov 2022-yilda ham oʻtkaziladi va gʻoliblar tahririyatning diplom hamda qimmatbaho sovgʻalari bilan taqdirlanadi. Shunday ekan, “Eng yaxshi maqolalar” tanlovida faol ishtirok eting hamda gʻolib boʻling!

Tahririyat.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?