Yaqinda Respublika Maʼnaviyat va maʼrifat markazining Xorazm viloyati boʻlimi rahbari, Urganch davlat universiteti tadqiqotchisi Bekzod Abdirimovning koʻp yillik ilmiy izlanishlari mahsuli — “Xorazmiylar izini izlab...” nomli asari chop etilgan edi. Muallif bu yoʻnalishdagi ilmiy izlanishlarini davom ettirib pokistonlik olim, doktor Vasim Sajjad bilan hamkorlikda “Sulton Jaloliddin Xorazmshoh Pokistonda” nomli kitobni nashrga tayyorladi. Oʻzbek, ingliz va urdu tillarida chop qilingan ushbu asarda sulton Jaloliddin Manguberdining 1221-1224-yillardagi siyosiy-harbiy faoliyati bilan bir qatorda Pokistonda amalga oshirgan bunyodkorlik ishlari haqida hikoya qilinadi. Kitobda buyuk sarkardaning zafarli yurishlari, soʻnmas jasoratlari haqida yurtimiz tarixchilari uchun yangilik boʻlgan qimmatli maʼlumotlar keltirilgan.

Davlatimiz rahbarining bevosita tashabbusi bilan joriy yilning oktyabr oyida “Jaloliddin Manguberdi tarixining yangi sahifalarini oʻrganish” mavzusidagi xalqaro konferensiya oʻtkazish rejalashtirilgan boʻlib, mazkur asar ushbu yirik anjuman oldidan munosib tuhfa boʻldi.

Odilbek Odamboyev,
“Xalq soʻzi”