Foto: Халқ сўзи

“Mahalla” xayriya jamoat fondi Shahrisabz shahar boʻlinmasi tashabbusi bilan Shahrisabz shahridagi 40 ta mahalla fuqarolar yigʻinining oila, xotin-qizlar va ijtimoiy-maʼnaviy masalalar boʻyicha rais oʻrinbosarlari ishtirokida estafetali yugurish boʻyicha musobaqa oʻtkazildi.

“Sogʻlom ayol - sogʻlom jamiyat” shiori ostida tashkil etilgan bu salomatlik tadbirida yugurishdan tashqari rahbar ayollar voleybol boʻyicha oʻzaro bahs olib bordi.

— Estafetali yugurishda barcha ishtirokchilar ortda qolmaslikka, marraga birinchilar qatorida yetib kelishga intilishdi, — deydi Shahrisabz shahar “Sariosiyo” mahalla fuqarolar yigʻini rais oʻrinbosari Tamara Oripova. — Bu faollik, chaqqonlik va epchillik, albatta, ish jarayonida ham asqatadi. Eng muhimi, rahbar ayollar bu saʼy-harakati bilan mahallalardagi xotin-qizlarga namuna boʻlishdi, ularga goʻyo “mahorat darsi” oʻtab berishdi. Kelgusida tumandagi barcha mahallalarda xotin-qizlar oʻrtasida sport-sogʻlomlashtirish tadbirlarini muntazam oʻtkazib borishga kelishib olindi.

Gʻolib va sovrindor ayollarga tashkilotchilar tomonidan esdalik sovgʻalari topshirildi.

Faxriddin Bozorov, “Xalq soʻzi”.