Фото: Халқ сўзи

«Маҳалла» хайрия жамоат фонди Шаҳрисабз шаҳар бўлинмаси ташаббуси билан Шаҳрисабз шаҳридаги 40 та маҳалла фуқаролар йиғинининг оила, хотин-қизлар ва ижтимоий-маънавий масалалар бўйича раис ўринбосарлари иштирокида эстафетали югуриш бўйича мусобақа ўтказилди.

«Соғлом аёл - соғлом жамият» шиори остида ташкил этилган бу саломатлик тадбирида югуришдан ташқари раҳбар аёллар волейбол бўйича ўзаро баҳс олиб борди.

— Эстафетали югуришда барча иштирокчилар ортда қолмасликка, маррага биринчилар қаторида етиб келишга интилишди, — дейди Шаҳрисабз шаҳар «Сариосиё» маҳалла фуқаролар йиғини раис ўринбосари Тамара Орипова. — Бу фаоллик, чаққонлик ва эпчиллик, албатта, иш жараёнида ҳам асқатади. Энг муҳими, раҳбар аёллар бу саъй-ҳаракати билан маҳаллалардаги хотин-қизларга намуна бўлишди, уларга гўё «маҳорат дарси» ўтаб беришди. Келгусида тумандаги барча маҳаллаларда хотин-қизлар ўртасида спорт-соғломлаштириш тадбирларини мунтазам ўтказиб боришга келишиб олинди.

Ғолиб ва совриндор аёлларга ташкилотчилар томонидан эсдалик совғалари топширилди.

Фахриддин Бозоров, «Халқ сўзи».