Foto: Sardorbek Poyonov/"Xalq so`zi"

Oʻzbekiston Respublikasi Gidrometeorologiya xizmati markazi 25-26-yanvarda Respublikamizda hukm suradigan ob-havo haqidagi maʼlumotni boʻlishdi.

Markazning maʼlum qilishicha, dam olish kunlari sovuq havo massalari Respublikadan chekina boshlaydi. Havo harorati koʻtarilishi fonida butun mamlakat boʻylab quyoshli va iliq ob-havo boʻlishi kutilmoqda.

Shanba kuni kechasi havo harorati 2 dan 7 darajagacha sovuq oraligʻida saqlanib, kunduzi 7-12 darajagacha iliq boʻladi. Yakshanba kuni esa kechasi harorat 2 daraja sovuqdan 3 daraja iliqqacha, kunduzi esa 9-14 darajagacha iliq boʻlishi taxmin qilingan.

Shuningdek, ayrim hududlarda shamolning tezligi 13-18 m/s gacha kuchayishi mumkin. Bundan tashqari, Toshkent va Namangan viloyatlarining togʻli hududlarida qor koʻchishi xavfi mavjudligicha qoladi.

Poytaxtimizda dam olish kunlari yogʻingarchilik kuzatilmaydi, shamol 3-8 m/s tezlikda esishi kutilmoqda. Shuningdek, tuman tushishi ehtimoli bor. Havo harorati kechasi 3-5 daraja sovuq, kunduzi esa 8-10 darajagacha iliq boʻladi.

Yakshanba kuni kechasi va ertalab yana tuman tushishi mumkin. Bu kunning harorati kechasi 0-2 daraja iliq boʻlib, kunduzi esa 11-13 darajagacha iliq boʻlishi kutilmoqda.

Fuqaro va haydovchilarga tumanli joylarda ehtiyotkor boʻlish, togʻli hududlarga esa safarni rejalashtirishda alohida eʼtibor berish tavsiya etiladi.