Qudratilla Najmiddinov/“Xalq soʻzi”. Mingbuloq tumani saylovchilari bu savolga aniq javob beradigan boʻldi. Tuman hokimligining “Mingbuloq” gazetasi oʻzining yangi yildagi ilk sonida hududlardan saylangan deputatlarni oʻz oʻquvchilariga batafsil tanishtirdi. Maxsus qoʻshsahifada Oliy Majlis Qonunchilik palatasi hamda xalq deputatlari mahalliy Kengashlariga saylangan tuman hokimidan tortib iqtisodchi-yu muallim, tadbirkor-u fermerlardan iborat deputatlarning suratlari, ish joyi, telefon raqami va saylov okrugiga doir maʼlumotlar toʻla chop etildi.

— Biz deputatlarimizni tumanimiz taraqqiyoti va xalq turmush farovonligini oshirishga chinakam hissa qoʻshishi tizimini yaratishda ishtirok etyapmiz, — deydi nashr muharriri Qosimjon Akbarov. — Gazetamizda yoritilgan ushbu qoʻshsahifani plakat shaklida ham koʻp nusxada chop ettirdik. Yaqinda Qonunchilik palatasi deputati Zafarjon Xudoyberdiyev ishtirokida konferensiya oʻtkaziladi. U Qonunchilik palatasida Prezidentimiz tomonidan qilingan maʼruzada deputatlar oldiga qoʻyilgan keng koʻlamli vazifalarni batafsil tushuntirib beradi.

Tuman gazetasining xayrli tashabbusi eʼtiborga molik. Zero, har bir saylovchi oʻzi ishonib ovoz bergan deputatini tanishi, unga oʻzi yoki hududning dolzarb masalalari yuzasidan murojaat qilib, muntazam muloqot oʻrnatishiga buning foydasi tegishi aniq.