Foto: “Xalq soʻzi”

Ahmadali ShERNAZAROV/“Xalq soʻzi”. Sirdaryo viloyatida Sirdaryo — Kvansan-Gu biznes forumi boʻlib oʻtdi.

Guliston shahridagi “Tadbirkorlar va hunarmandlar markazi”da boʻlib oʻtgan forumning ochilish marosimida Sirdaryo viloyati hokimi Akmaljon Maxmudaliyev, Janubiy Koreyaning Kvandju shahri Kvansan-Gu tumani hokimi Pak Byung Kyu, Koreya-Oʻzbekiston biznes assotsiatsiyasi (KUBA) raisi oʻrinbosari Kim Chang Keon ishtirok etdi.

Taʼkidlandiki, Oʻzbekiston va Janubiy Koreya davlatlari oʻrtasida doʻstlik va iqtisodiy aloqalarining tobora rivojlanib borayotgani doirasida hududlararo oʻzaro hamkorlik ham yanada kengaymoqda.

Forum dasturiga koʻra, Oʻzbekiston va Janubiy Koreyaning mazkur hududlari oʻrtasidagi iqtisodiy hamkorlik masalalari boʻyicha oʻzaro rasmiy muloqotlar, “G2B” va “B2B” formatidagi uchrashuvlar oʻtkazildi. Shuningdek, mehmonlar Guliston hamda Yangiyer shaharlaridagi qator ishlab chiqarish korxonalari faoliyati bilan tanishtirildi. Xususan, Yangiyer shahridagi “Mebelsozlik klasteri”da ishlab chiqarish jarayoni va mahsulotlarni koʻzdan kechirildi. “Sirdaryo” erkin iqtisodiy zonasining Yangiyerdagi hududida xorijiy sarmoyadorlar uchun yaratilgan imkoniyatlar haqida atroflicha maʼlumot berildi.

Sirdaryo — Kvansan-Gu biznes forumida Janubiy Koreyaning 15 ta yirik va yuqori salohiyatli kompaniyalari hamda 100 nafardan ziyod tadbirkorlari ishtirok etdi. Iqtisodiy anjumanda hamkorlik kelishuvlariga erishildi.