Oliy Majlis Senati Raisi Tanzila Narbayeva Yevropada xavfsizlik va hamkorlik tashkiloti (YXHT)ning amaldagi raisi, Shimoliy Makedoniya tashqi ishlari vaziri Buyar Osmanini qabul qildi.

Oʻzbekiston bilan YXHT oʻrtasidagi jumladan, parlamentlararo aloqalar, gender tengligi, inson huquqlari, atrof-muhitni muhofaza qilish va barqaror rivojlanishga erishish kabi yoʻnalishlardagi koʻp qirrali hamkorlikni yanada rivojlantirish masalalari muhokama qilindi.

Keyingi yillarda YXHT bilan hamkorlik sezilarli darajada faollashdi va munosabatlar sifat jihatidan yangi bosqichga koʻtarildi. Joriy yilning aprel oyida qabul qilingan 2023–2024-yillarda Oʻzbekiston Respublikasida YXHT loyihalarini amalga oshirish boʻyicha “Yoʻl xaritasi”da koʻzda tutilgan xavfsizlik, iqtisodiy-ekologik va ijtimoiy rivojlanish, iqlim oʻzgarishi, gender rivojlanishi kabi yoʻnalishlardagi 27 ta tadbir  muvaffaqiyatli amalga oshirilayotgani alohida qayd etildi.

2022-yilda birinchi marta YXHT PA doirasida Oʻzbekiston va Qozogʻiston tashabbus qilgan “YXHTning BMT Barqaror rivojlanish maqsadlarini amalga oshirish” rezolyutsiyasi qabul qilindi. Unda BRMni amalga oshirish, inklyuzivlikni oshirish va gender tengligini taʼminlash sohasida aniq tavsiyalar mavjud.

Shu nuqtai nazardan uchrashuvda Yevropada xavfsizlik va hamkorlik tashkiloti Parlament assambleyasi (YXHT PA) doirasidagi hamkorlikni kengaytirish masalalariga eʼtibor qaratildi.

Shuningdek, “yashil” iqtisodiyot va iqlim oʻzgarishiga qarshi kurashish gender tengligi masalalari boʻyicha oʻzaro hamkorlikni kuchaytirish, odam savdosi va majburiy mehnatga qarshi kurashish boʻyicha qoʻshma chora-tadbirlarni amalga oshirish yuzasidan fikr almashildi.

Buyar Osmani Oʻzbekistonda kechayotgan demokratik yangilanishlar va ijtimoiy-iqtisodiy islohotlar jarayonlarini qoʻllab-quvvatlashi va hamkorlikni rivojlantirishga  oʻz hissasini qoʻshishga tayyorligini bildirdi.