Foto: Xalq so‘zi

Kecha Samarqand shahrida anʼanaviy tarzda oʻtkazib kelinayotgan “Samarkand Marathon” xalqaro xayriya yugurish marafoni boʻlib oʻtdi. Unda qirqqa yaqin davlatdan 3300 dan ziyod ishtirokchi 2, 10, 21,1 va 42,2 kilometr masofani bosib oʻtdi.

Dastlab Registon maydonida musobaqaning 2 kilometrga yugurish bahslari start oldi.

Marafonda erkaklar bahsida Toshkent viloyati vakili Hasan Mirsoatov gʻoliblikni qoʻlga kiritdi. U 2021-yilda ham finishga birinchi boʻlib yetib kelgandi.

Xotin-qizlar orasida ushbu masofani rossiyalik Kamola Ablayeva birinchi boʻlib zabt etdi.

Marafonning 21,1 kilometrga oʻtkazilgan bahslarida erkaklar oʻrtasida Yevgeniy Fadeyev marra chizigʻini birinchi bosib oʻtgan boʻlsa, ayollar oʻrtasida qirgʻizistonlik sportchi Gulshanoy Sattorova birinchi boʻldi. 42,2 kilometr masofaga oʻtkazilgan erkaklar oʻrtasidagi bahslarda Qozogʻiston vakili Islom Amonqosh, ayollar oʻrtasida fargʻonalik Yekaterina Tunguskova gʻoliblikni qoʻlga kiritdi.

Marafon gʻoliblari pul mukofotlari va esdalik sovgʻalari bilan taqdirlandilar.

Abdulaziz Yoʻldoshev, “Xalq soʻzi”.