Rossiya Ukrainadagi janglarda ishtirok etuvchi yangi harbiy xizmatchilarga toʻlanadigan pul miqdorini keskin oshirmoqda. Bu qaror mamlakatda odamlarni frontga jalb qilish tobora qiyinlashib borayotgani fonida qabul qilindi. Soʻnggi kunlarda bir nechta hududlar hokimiyatlari roʻyxatdan oʻtish bonuslarini toʻrt baravargacha koʻtarishni eʼlon qildi.

Mutaxassislar taʼkidlashicha, Ukrainaga qarshi urush boshlanganiga uch yarim yil boʻldi va bu vaqt mobaynida Rossiya armiyasi katta talafotlarga uchradi — taxminan bir million nafar askar halok boʻlgan yoki yaralangan.

Rossiya mudofaa vaziri Andrey Belousov avgust oyida boʻlib oʻtgan oliy darajadagi yigʻilishda harbiy xizmatchilarni yollashni vazirlikning asosiy ustuvor yoʻnalishlaridan biri sifatida belgiladi. U hujum operatsiyalarini qoʻllab-quvvatlash uchun inson resurslari muhimligini alohida taʼkidladi.

Belousov yollash jarayoni yaxshi ketayotganini aytgan boʻlsa-da, mustaqil tergov agentligi IStories boshqacha maʼlumot keltirgan. Rasmiy byudjet maʼlumotlariga koʻra, 2025-yilning ikkinchi choragida mudofaa vazirligi bilan 37,9 ming kishi shartnoma imzolagan — bu oʻtgan yilga nisbatan ikki yarim barobar kam.

AQSHda joylashgan Urushni oʻrganish instituti tahlilchilari esa Rossiyadagi yollash jarayonlari mafkuraviy kampaniyadan koʻra tijorat tamoyillariga koʻproq oʻxshab borayotganini qayd etgan. Ular sentyabr oyidagi hisobotda Rossiya rasmiylari va norasmiy yollovchilar askar jalb etishda moddiy ragʻbatlantirish, aldash va majburlash usullaridan foydalanishda davom etayotganini taʼkidlashgan.

Toʻlovlar toʻrt baravar oshirildi

Sibirdagi Tyumen viloyati hukumati yangi yollanganlar uchun federal hukumat belgilagan 400 ming rubldan tashqari qoʻshimcha ravishda 3 million rubl (taxminan 36,5 ming AQSH dollari) bir martalik toʻlov tayinlanganini maʼlum qildi. Bu aksiyada ishtirok etish uchun noyabr oyining oxirigacha roʻyxatdan oʻtish talab etiladi.

Rossiya Federal statistika xizmati maʼlumotlariga koʻra, bu summa Tyumen viloyatidagi avvalgi 1,9 million rubllik toʻlovdan ancha yuqori va oʻsha hududdagi oʻrtacha uch yillik ish haqiga teng.

Shuningdek, Voronej viloyati gubernatori ham Telegram orqali roʻyxatdan oʻtish toʻlovi toʻrt baravar oshirilib, 2,1 million rublga yetganini maʼlum qildi. Mahalliy hukumat taʼkidlashicha, ushbu bonusni olish uchun faqat Voronej viloyatida yashash shart emas.

Tambov, Krasnodar, Qoʻrgʻon va Oltoy viloyatlari hamda Tatariston respublikasida ham janglarda ishtirok etuvchi askarlarga toʻlanadigan qoʻshimcha haq miqdori oshirilgani xabar qilindi. Ushbu toʻlovlar oylik maoshdan tashqari hisoblanadi va taxminan 210 ming rubldan (2600 dollar) boshlanadi — bu esa Rossiyadagi oʻrtacha ish haqining ikki barobaridan koʻpdir.