Botir MADIYOROV/“Xalq soʻzi”. Qoʻqon shahrida boʻlib oʻtgan Oʻzbekiston – Vengriya hududlararo birinchi xalqaro forumda qatnashgan Vengriyaning Yas-Nadkun-Solnok viloyati prezidenti Imre Xubay, ijrochi hokimi Attilo Berko boshchiligidagi delegatsiya Rishton tumanida ham boʻlgan edi.

Qardosh yurt vakillari tumandagi “Mingboshi keramik” kulolchilik muzeyida boʻlib, kulolchilik mahsulotlari koʻrgazmasi bilan tanishdi. Shuningdek, mehmonlarga har bir mahsulotni tayyorlanish jarayoni koʻrsatib berildi.

Muzeydagi murakkab hamda nafis naqshlar, oʻziga xos uslubda yaratilgan, tabiat manzaralari tushirilgan turli koʻrinishdagi serjilo idishlar hamda kulolchilik buyumlari koʻhna qitʼa vakillariga juda manzur boʻldi.

—Mehmonlar faoliyatimiz bilan tanishish asnosida rishtonlik kulollar bilan keng qamrovli hamkorlikka tayyor ekanini maʼlum qildi,—deydi “Chinor plyus” kulolchilik va turizm majmuasi rahbari Islom Orifjonov.

Yuzma-yuz muloqotlar soʻnggida Yas-Nadkun-Solnok viloyati prezidenti Imre Xubay Rishton tumani hokimligi delegatsiyasini keyingi yili Vengriyada oʻtkaziladigan nufuzli xalqaro forumga taklif etdi.